کفایت شعاری اپنانے کی بجائے ملک کے اثاثے فروخت کی جارہے ہیں: شمس الرحمان سواتی

لاہور (اُردو پوائنٹ اخبارتازہ ترین - آن لائن۔ 20 فروری2025ء) نیشنل لیبر فیڈریشن (این ایل ایف) کے مرکزی صدر شمس الرحمان خان سواتی نے کہاہے کہ ہم تعلیمی اداروں، ریلوے،بجلی کی کمپنیوں، پی آئی اے ودیگر اداروں کی نجکاری کی مذمت کرتے ہیں۔حکومت قرض پر قرض لئے جارہی ہے جس کو اتارنے کے لئے آئی ایم ایف کی ہر شرط پر آمین کہا جارہا ہے۔ کفایت شعاری اپنانے کی بجائے ملک کے اثاثے فروخت کی جارہے ہیں۔

یہ سارے ادارے بھی بیچ دیئے جائیں تب بھی قرض نہیں اترے گا۔ یہ بیچنے کے بعد کیا بیچا جائے گا۔ اب ملک کا بچہ بچہ جانتا ہے۔پہلے ممبران اسمبلی اور وزراء کی تنخواہوں میں اضافہ کیا گیا، اب اراکین پارلیمنٹ اپنی تنخواہوں میں اضافے کا بل پاس کروانے کے لئے بے چین ہیں۔ پاکستان کو مزدور، کسان اور متوسط طبقہ پس رہا ہے۔

(جاری ہے)

مہنگائی آسمان کو چھو رہی ہے۔

ریڑھی بانوں، سٹال والوں کو متبادل روزگار دیئے بغیررزق چھین لیا گیا ہے۔ان کے گھروں میں فاقے ہیں۔لیکن کوئی پوچھنے والا نہیں ریاست کا کردار ماں جیسا ہو تاہے۔ ہمارا مطالبہ ہے کہ حکومت فوری طور پر بے روز گار افراد کے لئے روزگار کا متبادل انتظام کرے۔ تمام اداروں کی نجکاری فوری طور پر روکی جائے۔ان کو منافع بخش بنانے کیلئے ایماندار اور اہل افسران کو تعینات کیا جائے۔

ورنہ ملک گیر تحریک چلائی جائے گی۔ ان خیالات کا اظہار انہوں نے گزشتہ روز لٹن روڈمیں منعقدہ اینٹی نجکاری کانفرنس سے خطاب کرتے ہوئے کیا۔اس موقع پر مزدور فیڈریشنز، ٹریڈ یونینز اور سرکاری ملازمین کی تنظیموں کی مشاورت سے اینٹی پرائیویٹائزیشن اینڈکنٹریکٹ سسٹم لیبر الائنس (APCLA)کا قیام عمل میں لایا گا۔ جس کی صدارت کی ذمہ داری شمس الرحمان خان سواتی کو سونپی گئی۔

اس موقع پرممبران پارلیمنٹ سے ملاقاتوں کیلئے کمیٹیاں بھی تشکیل دی گئی ہیں اور26فروری کو اینٹی پرائیویٹائزیشن اینڈکنٹریکٹ سسٹم لیبر الائنس کے پلیٹ فارم سے ملک گیر احتجاجی مظاہروں کی کال بھی دی گئی ہے۔ اس کانفرنس میں شمس الرحمن سواتی صدر نیشنل لیبر فیڈریشن پاکستان،محمد اکبر سینئر نائب صدر متحدہ لیبر فیڈریشن، حنیف رامے جنرل سیکرٹری متحدہ لیبر فیڈریشن،عبدالرحمن آسی چیئرمین ورکرز فیڈریشن،آئمہ محمود جنرل سیکرٹری آل پاکستان ٹریڈ یونین فیڈریشن پنجاب، نیاز خان جنرل سیکرٹری ٹی پی جی ڈبلیو ایف،بابا محمد سرور پاکستان فوڈ ورکرز فیڈریشن، ملک احتشام الحسن صدر آل بینکس ایمپلائز فیڈریشن،حافظ لطف اللہ سیکرٹری جنرل پی ٹی سی ایل ورکرز اتحاد فیڈریشن، قیصر نور رضا آرگنائزر گلوبل یونین پاکستان کونسل،سید نظر حسین شاہ صدر پیپلز لیبر بیورو پنجاب،محمد بشارت چوہدری صدر آل پاکستان یونیورسٹیز ایمپلائیز فیڈریشن،گل نواز خان سواتی صدر آل پاکستان بلدیاتی ورکرز اینڈ سٹاف فیڈریشن،سید انصر عباس جنرل سیکرٹری اے پی سی ایف اے پاکستان، عاشق خان صدر لیبر یونیورسٹی آف ایپکو اسلام آباد، اسد الرحمن آسی ڈپٹی سیکرٹری جنرل اے پی یو آئی ای ایف، مرزا عبدالرؤف جرال نائب صدر ہائیڈرو الیکٹرک ورکرز یونین لیسکو، میاں محمد احمد وٹو چیئرمین ایریگیشن پاسبان یونین پنجاب،شیخ محمد انور صدر ریلوے پریم یونین پاکستان سی بی اے، ظفر ملک سیکرٹری جنرل ریلوے پاکستان ورکرز یونین اوپن لائن، رانا عابد حسین صدر ایمپلائز اینڈ لیبر یونین اتحاد کیمیکل کالا شاہ کاکو سی بی اے،ساجد خان ایمپکو ایمپلائز یونین سی بی اے،محمد بشیر چیئرمین فونیکس پاکستان سی بی اے،عزیر قدیر جنرل سیکرٹری پٹاک ورکر یونین سی بی اے،میاں محمد ریاض جنرل سیکرٹری ایپکا پنجاب،محمد سرفراز خان ریلوے لیبر یونین پاکستان، چودری محمود الاحد صدر ریلوے پریم یونین ورکشاپ اسٹیبلشمنٹ پاکستان،مشتاق باجوہ صدر ریلوے ورکرز یونین ورکشاپ،محمد یوسف ملک صدر لیسکو ایمپلائز پیغام یونین،جمشید اقبال سیال صدر ایمپلائیز یونین نیسلے پاکستان، میاں اعجاز سیکرٹری جنرل پاکستان رکشہ ویگن پاسبان یونین،عبدالستار شاہ ایل ڈبلیو ایم سی لاہور،زبیر ملک سابق ڈپٹی سیکرٹری جنرل ہائیڈرو الیکٹرک ورکر زیونین پاکستان، محمد یونس صدرشاہین ورکرز یونین ہمدرد پاکستان، رانا عمر فاروق صدر ایم سی بی ایمپلائیز ٹریڈ یونین، مزمل حسین شزان انٹرنیشنل یونین مزدور اتحاد پاکستان، کامریڈ عرفان علی جنرل سیکرٹری ایم کے پی، چوہدری محمد صدیق، صدر پی ڈبلیو ڈبلیو ایف ای یو،علی مروان خان صدر پاکستان ریلوے انقلابی یونین سمیت 50 دیگریونین کے عہدے داران نے شرکت کی۔

شمن الرحمان نے تمام شرکاء کا شکریہ ادا کیا اور دعا کے ساتھ کانفرنس اختتام پذیر ہوئی۔