اگلے انتخابات 2029ء میں ہی ہوں گے‘ تب تک اپوزیشن انتظار کرے، امیرمقام کا مشورہ

سوات ( اُردو پوائنٹ اخبارتازہ ترین۔ 02 مارچ 2025ء ) وفاقی وزیر امور کشمیر و گلگت بلتستان اور سیفران انجینئر امیر مقام نے کہا ہے کہ وزیرِاعظم محمدشہباز شریف کی قیادت میں پاکستان معاشی بحالی اور استحکام کی راہ پر گامزن ہے، مہنگائی میں کمی، برآمدات میں اضافہ اور بڑے ترقیاتی منصوبوں کی بحالی اس کا واضح ثبوت ہیں۔ نادرا رجسٹریشن سنٹر کے افتتاح کی تقریب سے خطاب کرتے ہوئے انہوں نے کہا کہ مسلم لیگ ن کی حکومت عوام کو ریلیف فراہم کرنے کے لیے دن رات کام کر رہی ہے جس کے نتائج جلد مزید نمایاں ہوں گے، وزیراعلیٰ پنجاب مریم نواز عوامی خدمت میں مصروف ہیں، پنجاب میں صحت، تعلیم، انفراسٹرکچر اور سوشل ویلفیئر کے منصوبے برق رفتاری سے مکمل کیے جا رہے ہیں، جس سے عوام کو حقیقی ریلیف مل رہا ہے۔

(جاری ہے)

امیر مقام کا کہنا ہے کہ نواز شریف کا وژن پاکستان کو ترقی کی راہ پر واپس لانا ہے اور مسلم لیگ ن کی حکومت اسی وڑن کے تحت کام کر رہی ہے، نواز شریف نے ہمیشہ عوامی خدمت، معاشی ترقی اور ملکی استحکام کو ترجیح دی اور آج ان کے وڑن کے مطابق ملک کو دوبارہ ترقی کی راہ پر گامزن کر دیا گیا ہے، اپوزیشن کا حالیہ اتحاد ذاتی مفادات پر مبنی ہے، عوام ان کے اصل عزائم سے بخوبی واقف ہیں، یہ اتحاد کسی پائیدار مقصد کے لیے نہیں بلکہ محض ذاتی مفادات کے حصول کے لیے بن رہے ہیں، اگر اتحاد بنانا ہے تو ملک میں دہشت گردی، معاشی استحکام اور بے روزگاری کے خاتمے کے لیے بنایا جائے، اگلے عام انتخابات 2029 میں ہی ہوں گے، تب تک اپوزیشن کو انتظار کرنا ہوگا۔

انہوں نے خیبر پختونخواہ حکومت کو آڑے ہاتھوں لیتے ہوئے کہا کہ پی ٹی آئی حکومت کے پاس صوبے کے عوام کے لیے کوئی ٹھوس منصوبہ نہیں، یہ محض اقتدار کے حصول میں مصروف ہیں، پہلے اسلام آباد پر قبضے کے خواب دیکھ رہے تھے، اب وزارتوں کے لیے سرگرداں ہیں مگر انہیں خیبر پختونخواہ کے عوام کی کوئی پرواہ نہیں، خیبر پختونخواہ کے عوام پی ٹی آئی کی حقیقت جان چکے ہیں، یہی وجہ ہے کہ ان کی مقبولیت کا گراف تیزی سے گر رہا ہے، اوورسیز پاکستانیوں نے بھی پی ٹی آئی کی کال کو مسترد کر دیا، جو اس بات کا واضح ثبوت ہے کہ عوام اب ان کی حقیقت جان چکے ہیں۔

وفاقی وزیر کا کہنا ہے کہ مسلم لیگ ن کی حکومت عوامی خدمت پر یقین رکھتی ہے اور ملکی استحکام و ترقی کے لیے ہر ممکن اقدامات کر رہی ہے، بانی پی ٹی آئی کوامریکی صدر ٹرمپ کے یوکرین کے صدر کے ساتھ رویے سے سبق سیکھنا چاہیے، ان کے تحریر کردہ خطوط کا کوئی مستقبل نہیں کیوں کہ ان کا مقدر صرف ردی کی ٹوکری ہے۔