مقبوضہ کشمیر، اسلامی کتب ضبط کرنے کیخلاف شدید احتجاج

مسلم رہنماوں نے اس اقدام کو مذہبی لٹریچر پر بلا جواز حملہ قرار دیدیا

منگل 4 مارچ 2025 12:05

سری نگر(اُردو پوائنٹ اخبارتازہ ترین - این این آئی۔ 04 مارچ2025ء)مقبوضہ جموں کشمیر میں اسلامی کتب ضبط کر نے پر شدید احتجا ج جاری ہے۔ غیر ملکی میڈیا کے مطابق مقبوضہ کشمیر میں ریاستی دارالحکومت سری نگر سے شروع ہونے والا چھاپوں کا سلسلہ مقبوضہ کشمیر کے دیگر علاقوں میں پھیل گیا ہے۔مسلم رہنماوں نے اس اقدام کو مذہبی لٹریچر پر بلا جواز حملہ قرار دیا ہے۔

مقبوضہ ریاست میں پولیس نے بظاہر یہ تاثر دینے کی کوشش کی تھی کہ ایک کالعدم تنظیم کے نظریات پھیلانے والی کتب کے خلاف یہ کارروائی کی جا رہی ہے، تاہم مقامی کتب فروشوں نے اس دعوے کو یکسر مسترد کر دیا ہے۔دکانداروں کا کہنا تھا کہ ضبط کی جانے والی کتابوں میں جماعتِ اسلامی کے بانی ابو الاعلی مودودی کی کتب بھی شامل ہیں۔

(جاری ہے)

دوسری جانب کٹھ پتلی وزیرِ اعلی عمر فاروق نے اس حرکت کی مذمت کرتے ہوئے اسے دباو کا ہتھ کنڈا قرار دیا ہے۔

انہوں کہا ہے کہ یہ کتب تو انٹر نیٹ پر بھی موجود ہیں۔خطے میں رہنے والے بہت سے کشمیریوں اور تجزیہ کاروں کی رائے ہے کہ مودی حکومت کی جانب سے 2019 میں ریاستی خود مختاری ختم کرنے سے شہری آزادیوں پر قدغن لگی ہے۔بھارت میں لیفٹیننٹ گورنر منوج سنہا کی زیرِ قیات ہندو توا حکومت نے مقبوضہ جمو کشمیر میں اسلامی کتب اور تاریخی لٹریچر کے خلاف آپریشن شروع کر دیا ۔ کل جماعتی حریت کانفرنس کے ترجمان عبد الرشید منہاس نے سرینگر سے جاری کیے گئے بیان میں کہا کہ بھارت کی بی جے پی حکومت آر ایس ایس کے ایجنڈے کے تحت مسلمانوں کی شناخت مٹانے اور تاریخ تبدیل کرنے کے لیے جموں کشمیر کی نوجوان نسل کو گمراہ کرنے کے لیے اسکولوں میں ہندو توا نظریے پر مبنی نصاب مسلط کر رہی ہے۔