شدید بارش،رمضان میں ٹریفک روانی یقینی بنانے والے ٹریفک افسران و اہلکاروں میں توصیفی اسناد تقسیم

منگل 4 مارچ 2025 19:55

سوات (اُردو پوائنٹ اخبارتازہ ترین - این این آئی۔ 04 مارچ2025ء)ایس پی ٹریفک وارڈن حبیب اللہ خان نے شدید بارش اور رمضان المبارک کے دوران ٹریفک کی روانی کو یقینی بنانے میں نمایاں کارکردگی دکھانے والے ٹریفک پولیس افسران اور اہلکاروں کو توصیفی اسناد اور نقد انعامات سے نوازا۔ایس پی ٹریفک وارڈن حبیب اللہ خان نے اس موقع پر کہا کہ رمضان المبارک کے دوران عوام کو سفری سہولیات کی فراہمی ٹریفک پولیس کی اولین ترجیح رہی۔

مینگورہ سٹی میں گریویٹی اسکیم کی کھدائی اور گاڑیوں کے لیے باقاعدہ پارکنگ کی سہولت نہ ہونے کے باوجود ٹریفک پولیس نے مثر حکمت عملی اپناتے ہوئے رش پر قابو پایا اور شہریوں کو سفری سہولت فراہم کی۔ایس پی ٹریفک وارڈن حبیب اللہ خان نے ٹریفک پولیس کے افسران و اہلکاران کی محنت، نظم و ضبط اور عوامی خدمت کے جذبے کو سراہتے ہوئے کہا کہ یہ اہلکار ہمارے محکمے کا فخر ہیں۔

(جاری ہے)

انہوں نے شہریوں سے بھی اپیل کی کہ وہ رمضان المبارک کے مقدس مہینے میں صبر و تحمل کا مظاہرہ کریں اور ٹریفک پولیس کے ساتھ بھرپور تعاون کریں، غلط پارکنگ اور سڑکوں پر تجاوزات سے اجتناب کریں تاکہ ٹریفک کی روانی متاثر نہ ہو۔انہوں نے ٹریفک افسران اور اہلکاران کو ہدایت کی کہ وہ آئندہ بھی ایمانداری عزم اور محنت کے ساتھ اپنی ذمہ دار یاں نبھائیں تاکہ شہریوں کو مزید بہتر سفری سہولیات فراہم کی جا سکیں۔