Live Updates

پاک افغان بارڈر کے قریب آپریشن؛ سرحد پار سے آنیوالے دہشتگرد گرفتار، کئی انکشافات سامنے آگئے

دہشتگردوں کو تفتیش کیلئے نامعلوم مقام پر منتقل کردیا گیا، دہشتگردوں کے قبضے سے بڑی تعداد میں اسلحہ اور گولہ بارود برآمد ہوا، راکٹ لانچر، اینٹی ٹینک مائنز اورخودکش جیکٹ میں استعمال ہونے والا مواد بھی ملا

ساجد علی جمعرات 6 مارچ 2025 11:25

پاک افغان بارڈر کے قریب آپریشن؛ سرحد پار سے آنیوالے دہشتگرد گرفتار، ..

کوئٹہ ( اُردو پوائنٹ اخبارتازہ ترین۔ 06 مارچ 2025ء ) پاک افغان بارڈر کے قریب آپریشن کے دوران سرحد پار سے آنیوالے دہشتگرد گرفتار کرلیے گئے جس کے بعد کئی انکشافات سامنے آگئے۔ میڈیا رپورٹس کے مطابق سکیورٹی ذرائع کا کہنا ہے کہ 5 مارچ 2025ء کو بلوچستان میں پاک افغان سرحد کے قریب علاقے ٹوبہ کاکڑی میں سکیورٹی فورسز نے کامیاب آپریشن کیا جس دوران 4 اہم دہشت گرد گرفتار کیے گئے، گرفتار دہشت گردوں سے کلاشنکوفیں، دستی بم اور دیگر آتشیں اسلحہ برآمد ہوا، جس کے بعد گرفتار دہشتگردوں نے دہشت گردی کی بڑی کارروائی کی منصوبہ بندی کا اعتراف بھی کرلیا۔

سکیورٹی ذرائع نے بتایا کہ گرفتار اسام الدین ولد گلشاد نامی دہشت گرد کا اعترافی بیان میں کہنا ہے کہ ’میں افغانستان سے آیا ہوں، ہمارا نظریہ ہماری ٹریننگ ہے، میرے پاس 2 بندوقیں، 2 کلاشنکوف، ایک گرینیڈ اور دیگر اسلحہ موجود تھا، ہم افغانستان سے 3 دن پہلے پاکستان میں داخل ہوئے، ہم سرحدی باڑ کے ذریعے رات میں چوری سے پاکستان میں داخل ہوئے اور ہم نے آگے پشین جانا تھا‘۔

(جاری ہے)

سکیورٹی ذرائع نے بتایا کہ پاکستان میں دہشت گردی کی لہر میں اضافے کی بنیادی وجہ افغانستان کی سرزمین پر پنپتی دہشت گرد تنظیمیں ہیں، دہشت گردوں کے خلاف اس آپریشن کی کامیابی میں مقامی لوگوں نے اہم کردار ادا کیا، گرفتار دہشت گردوں کو مزید تفتیش کے لیے نامعلوم مقام پر منتقل کر دیا گیا جب کہ مقامی لوگوں کا دہشت گردوں کے خلاف سیکیورٹی فورسز کے شانہ بشانہ لڑنا خوش آئند ہے۔

بتایا جارہا ہے کہ سکیورٹی فورسز نے پیشن کے علاقے ٹوبہ کاکڑی میں آپریشن کے دوران 4 دہشت گردوں کو گرفتار کیا، اس حوالے سے سیکیورٹی فورسز نے پشین کے علاقے ٹوبہ کاکڑی میں انٹیلی جنس بیسڈ آپریشن کیا، دہشت گردوں کے قبضے سے بڑی تعداد میں اسلحہ اور گولہ بارود برآمد ہوا، دہشتگردوں سے راکٹ لانچر، اینٹی ٹینک مائنز اورخودکش جیکٹ میں استعمال ہونے والا مواد بھی ملا، گرفتار دہشتگردوں کو تفتیش کے لئے خفیہ مقام پر منتقل کردیا گیا۔