بلدیاتی نمائندگان ممبران اسمبلی کا متبادل نہیں،دونوں کا الگ دائرہ کار ، اختیارات دیئے جائیں، فاروق حیدر

آئین میں عدلیہ،انتظامیہ اور مقننہ کا دائرہ کار اوراختیارات وضع شدہ ہیں،ترقی یافتہ ممالک میں بنیادی مسائل حل کرنا بلدیاتی نمائندگان کے ذمہ ہے، سابق وزیراعظم آزاد کشمیر

بدھ 12 مارچ 2025 20:14

مظفرآباد(اُردو پوائنٹ اخبارتازہ ترین - این این آئی۔ 12 مارچ2025ء)سابق وزیراعظم آزادکشمیر راجہ فاروق حیدر خان نے کہا ہے کہ بلدیاتی نمائندگان کو اختیارات دیئے جائیں،بلدیاتی نمائندگان ممبران اسمبلی کا متبادل نہیں،دونوں کا الگ دائرہ کار ہے،آئین میں عدلیہ،انتظامیہ اور مقننہ کا دائرہ کار اوراختیارات وضع شدہ ہیں۔ترقی یافتہ ممالک میں بنیادی مسائل حل کرنا بلدیاتی نمائندگان کے ذمہ ہے۔

(جاری ہے)

آزادکشمیرحکومت نے بلدیاتی نمائندگان کو فنڈز کے اجراء کے حوالے سے ہائی کورٹ کے فیصلہ پر عملدرآمد کے سلسلہ میں جو اجلاس بلایا تھا اس میں شرکت نہیں کی نومنتخب بلدیاتی نمائندگان کو اختیارات اوربلدیاتی اداروں کو وسائل کی فراہمی کی راہ میں جو لوگ رکاوٹ ہیں انہیں بے نقاب کرنے کی ضرورت ہے،ان خیالات کا اظہار انہوں نے اپنی رہائش گاہ پر مختلف وفودسے گفتگو کرتے ہوئے کیا دریں اثنا سابق وزیراعظم نے سپریم کورٹ بار روم میں سابق صدر و قائداعظم کے پرائیویٹ سیکرٹری کے ایچ خورشید کی برسی کے حوالے سے منعقدہ دعائیہ تقریب میں بھی شرکت کی اس موقع پر وکلا سے بات چیت کرتے ہوے راجہ فاروق حیدر خان نے کہا کہ خورشید حسن خورشید ایک بلند کردار کی حامل شخصیت تھے جن پر قائداعظم بے پناہ اعتماد کرتے تھے قیام پاکستان کے حواکے سے ان کے کردار کا حضرت قائد اعظم نے بھی برملا اعتراف کیا ہے آزادکشمیر کی سیاست کے اندر ان کے کردار،نظریات لافانی ہیں وہ انتہائی نفیس شخصیت تھے جب ان کی وفات ہوئی تو جیب سے 25 روپے اور 50 پیسے نکلے میرے ساتھ وہ بہت شفقت فرماتے تھے بلدیاتی نمائندگان کے وفد سے بات چیت کرتے ہوے سابق وزیراعظم نے کہا کہ آئین میں تمام اداروں کے اختیارات کی تقسیم کارواضح طورپر موجود ہے،مقننہ،انتظامیہ اور عدلیہ کے اختیارات وضع شدہ ہیں،بلدیاتی ادارے بنیادی مسائل کے حل کے لیے ہیں یہ اسمبلی کا متبادل نہیں،اس لیے ممبران اسمبلی کو خوفزدہ نہیں ہونا چاہیے تاہم بلدیاتی نمائندگان کو بھی یہ بات ذہن نشین کرنی چاہیے کہ ایم ایل ایز اور ان کے اختیار اور ذمہ داریوں میں فرق ہے۔