امریکن پاکستانی فزیشن آف نارتھ امریکا کا سالانہ سپرنگ کنونشن اوکلاہوما میں 3 اپریل کو ہوگا

جمعرات 20 مارچ 2025 17:35

واشنگٹن (اُردو پوائنٹ اخبارتازہ ترین - اے پی پی۔ 20 مارچ2025ء) امریکا میں مقیم پاکستانی ڈاکٹرز کی تنظیم امریکن پاکستانی فزیشن آف نارتھ امریکا(اے پی پی این اے) کا سالانہ سپرنگ کنونشن رواں سال اوکلاہوما میں 3 اپریل کو ہو گا جو 6 اپریل تک جاری رہے گا۔ کنونشن میں امریکا بھر سے پاکستانی نژاد ڈاکٹرز، ان کے اہل خانہ اور کمیونٹی کے افراد شریک ہوں گے۔

کنونشن اوکلاہوما سٹی کے فائیو سٹار ہوٹل میں منعقد ہوگا، جہاں طبی، تعلیمی اور ثقافتی سرگرمیوں کا اہتمام کیا گیا ہے۔ ڈاکٹرز کےلئے Continue Medical Education (CME) سیشنز رکھے گئے ہیں تاکہ وہ جدید طبی تحقیق اور ٹیکنالوجی سے باخبر رہیں۔ اس کے علاوہ اعضا کی پیوندکاری سے متعلق آگاہی کے لئے ایک ٹرانسپلانٹ وال بھی قائم کی جائے گی۔

(جاری ہے)

کنونشن میں پاکستانی ثقافت کو اجاگر کرنے کے لئے بسنت میلے کا اہتمام کیا گیا ہے ۔

پاکستانی کھانوں کی فوڈ سٹریٹ بھی لگائی جائے گی ۔ پاکستان کلچر شو میں نامور گلوکار حمیرا چنا، شفقت امانت علی خان اور میکا سنگھ اپنی آواز کا جادو جگائیں گے جبکہ گلوکاری کے شوقین ڈاکٹر بھی اپنی صلاحیتوں کا مظاہرہ کریں گے۔ پاکستانی مصنوعات کو فروغ دینے کے لیے ایک بڑا بازار بھی لگایا جائے گا ۔ نمایاں کارکردگی کا مظاہرہ کرنے والے ڈاکٹروں کو خصوصی ایوارڈز بھی دیئے جائیں گے۔

رواں سال میزبانی کے فرائض ڈاکٹر افضل اکبر انجام دے رہے ہیں جبکہ ڈاکٹر ثاقب اور ڈاکٹر نعیم بھی انتظامات کو کامیاب بنانے میں پیش پیش ہیں۔ کنونشن کی قیادت اے پی پی این اے کی صدر ڈاکٹر حمیرا قمر کریں گی، جو پیشے کے لحاظ سے بچوں کے امراض کی ماہرڈاکٹر ہیں اور اورلانڈو میں ان کا ذاتی کلینک ہے۔ تقریب میں اوکلاہوما کے گورنر، کانگریس مین، سینیٹرز، میئر اور تھنک ٹینک کے افراد بھی شریک ہوں گے۔ اے پی پی این اے کا یہ سالانہ کنونشن پاکستانی نژاد امریکی ڈاکٹروں کے لیے سیکھنے، ثقافت کے فروغ اور باہمی روابط کے لیے ایک اہم موقع ثابت ہوگا۔