قائداعظم نے برصغیر کے مسلمانوں کو پاکستان کی صورت میں علیحدہ وطن دیا، سید فخر امام شاہ

ملتان (اُردو پوائنٹ اخبارتازہ ترین - اے پی پی۔ 24 مارچ2025ء) سابق سپیکر قومی اسمبلی و سابق وفاقی وزیر سید فخر امام شاہ، سابق وفاقی وزیر علامہ سید حامد سعید کاظمی، پرو وائس چانسلر وویمن یونیورسٹی ملتان پروفیسر ڈاکٹر کلثوم پراچہ اور صدر ینگ پاکستانیز آرگنائزیشن نعیم اقبال نعیم نے کہا ہے کہ قائد اعظم 20 ویں صدی کے عظیم قائدین میں شامل ہیں ان کے بتائے ہوئے اصولوں پر عمل کی ضرورت ہے، قائد اعظم وہ عظیم رہنما ہیں جنہوں نے براعظم ایشیاءکا جغرافیہ بدلا اور ہمیں پاکستان عطا کیا۔

قائد اعظم نے برصغیر کے مسلمانوں کو علیحدہ وطن دیا ۔ہمیں متحد ہو کر قائد اعظم کی تعلیمات پر قائم رہنے کے عزم کا اعادہ کرنا ہے قوم کو ترقی کیلئے اتحاد ، ایمان اور نظم و ضبط کے اصولوں پر عمل پیرا ہونا ہے ان خیالات کا اظہار انہوں نے یوم قرارداد پاکستان کے سلسلہ میں ینگ پاکستانیز آرگنائزیشن اور ویمن یونیورسٹی ملتان کے زیر اہتمام جناح ہال ویمن یونیورسٹی ملتان میں منعقدہ خصوصی سیمینار سے خطاب کرتے ہوئے کیا۔

(جاری ہے)

سیمینار کی صدارت پرو وائس چانسلر ویمن یونیورسٹی ملتان پروفیسر ڈاکٹر کلثوم پراچہ نے کی۔ مہمان خصوصی سابق سپیکر قومی اسمبلی سید فخر امام شاہ اور سابق وفاقی وزیر علامہ سید حامد سعید کاظمی شاہ تھے جبکہ مہمانان اعزاز میں صدر نظریہ پاکستان فورم ملتان پروفیسر ڈاکٹر حمید رضا صدیقی، رجسٹرار ویمن یونیورسٹی ملتان پروفیسر ڈاکٹر میمونہ یاسمین خان، چیئرمین ڈیپارٹمنٹ آف جینڈر سٹیڈیز BZU ملتان ڈاکٹر مرید حسین ملک، سجادہ نشین دربار حضرت داود جہانیاں مخدوم شعیب اکمل قریشی ہاشمی، چیئرمین ہیومن رائٹس جنوبی پنجاب چوہدری ابرار حسین، پرنسپل پاک ترک معارف انٹرنیشنل سکول ملتان سیدہ قراةالعین اقبال، ماہر تعلیم پروفیسر ڈاکٹر ریاض حسین، سماجی رہنما رشید عباس خان اور سماجی رہنما و صدر ینگ پاکستانیز آرگنائزیشن نعیم اقبال نعیم تھے۔

سیمینار سے خطاب کرتے ہوئے سید فخر امام شاہ نے کہا کہ پاکستان کو قائد اعظم کے تصور کے مطابق ترقی کی راہ پر گامزن ہونا چاہیے، قائد اعظم کا فرمان سچ ثابت ہوا کہ انتہا پسند ہندو مسلمان اقلیت کو عزت و احترام سے نہیں رہنے دیں گے ۔آج وہاں لوگوں کی زندگی اجیرن ہے سید فخر امام نے مزید کہا کہ قائد اعظم نے ہندوّوں کی مکارانہ اور انگریزوں کی جارہانہ چالوں کا مردانہ وار مقابلہ کرتے ہوئے ہمارے لیے الگ وطن پاکستان حاصل کیا۔

فرمودات قائداعظم ترقی پاکستان کا زینہ ہے ہم قائداعظم محمد علی جناح کے اصول اپنا کر پاکستان کو ترقی یافتہ اور مستحکم بنا سکتے ہیں ۔نوجوان پاکستان کا مستقبل اور امید کی کرن ہیں۔ انہوں نے ہی پاکستان کے اندھیرے دور کرنے ہیں اور روشنی پھیلانی ہے۔ سیمینار سے خطاب کرتے ہوئے سابق وفاقی وزیر برائے مذہبی امور علامہ سید حامد سعید کاظمی نے کہا کہ 23مارچ 1940ءکا دن پاکستان کی تاریخ کا ناقابل فراموش دن ہے جس کی اہمیت کو نظر انداز نہیں کیا جاسکتا، کیونکہ درحقیقت اس دن پاکستان کی بنیاد رکھی گئی تھی ۔

علامہ سید حامد سعید کاظمی نے مزید کہا کہ قائداعظم کے فرمودات اور تعلیمات ہمارے لیے مشعل راہ ہیں ہمیں چاہیے کہ قائداعظم کے افکار پر چلتے ہوئے پاکستان کو حقیقی معائنوں میں علامہ اقبال اور قائداعظم کا پاکستان بنائیں۔ پروفیسر ڈاکٹر کلثوم پراچہ نے کہا کہ قائد اعظم اس صدی کے عظیم لیڈر ہیں وہ بات کے پکے اور قول کے سچے تھے اور انہوں نے کبھی اپنی بات واپس نہیں لی۔

قائداعظم وہ شخصیت تھے جنہوں نے اپنی قائدانہ صلاحیتوں سے دنیا کا نقشہ بدل دیا۔ اس موقع پر تقریب سے ڈاکٹر مرید حسین ملک، چوہدری ابرار حسین اور نعیم اقبال نعیم نے خطاب کرتے ہوئے کہا کہ نئی نسل کو چاہئے کہ قائداعظم کو اپنا رول ماڈل بنائیں، ان کی تعلیمات اور فرمودات کو اپناتے ہوئے ان پر عمل پیرا ہوں ۔قائداعظم ایک سچے اور کھرے لیڈر تھے جنہوں نے ہمیں اس آزاد مملکت کا تحفہ دیا۔