Live Updates

جیل انتظامیہ نے عمران خان کو پیغام دیا ہے کہ عید کی چھٹیوں میں ملاقات نہیں ہوگی

آج جیل میں فیملی کی ملاقات کے دن بشریٰ بی بی کی فیملی کو ملاقات کا موقع دیا گیا لیکن ہم تینوں بہنوں کو عمران خان سے ملاقات کی اجازت نہیں دی گئی، علیمہ خان کا انکشاف

محمد علی منگل 25 مارچ 2025 19:45

جیل انتظامیہ نے عمران خان کو پیغام دیا ہے کہ عید کی چھٹیوں میں ملاقات ..

راولپنڈی (اُردو پوائنٹ اخبارتازہ ترین۔ 25 مارچ 2025ء) علیمہ خان نے انکشاف کیا ہے کہ جیل انتظامیہ نے عمران خان کو پیغام دیا ہے کہ عید کی چھٹیوں میں ملاقات نہیں ہوگی۔ تفصیلات کے مطابق بانی تحریک انصاف اور سابق وزیر اعظم عمران خان کی بہن علیمہ خان نے اپنے بھائی سے بہنوں کی ملاقات نہ کروائے جانے پر شدید ردعمل دیا ہے۔ منگل کے روز راولپنڈی میں اڈیالہ جیل کے باہر میڈیا سے گفتگو کرتے ہوئے عمران کی بہن علیمہ خان نے کہا کہ آج جیل میں اہل خانہ کی ملاقات کا دن ہے، بشریٰ بی بی کے اہل خانہ کو ملاقات کا موقع دیا گیا لیکن ہم تینوں بہنوں کو ملاقات نہیں دی گئی، ڈھائی گھنٹے جیل کے اندر بٹھا کر رکھا گیا۔

علیمہ خان نے انکشاف کیا کہ عمران خان نے وکلا کو بتایا جیل انتظامیہ نے انہیں پیغام دیا ہے عید کی چھٹیوں میں ملاقات نہیں ہوگی، حامد خان اور عزیر بھنڈاری کو بھی ملاقات کی اجازت نہیں دی گئی۔

(جاری ہے)

ان کا کہنا تھا کہ اگر عدالت میڈیا سے گفتگو پر وکلا کو پابند کرسکتی ہے تو فہرست کے مطابق ملاقات پر پابند کیوں نہیں کرسکتی؟ جیل میں ملاقات سے متعلق کہا کہ عمران خان سے مرضی کے لوگوں کی ملاقاتیں کروائی جارہی ہیں، جو لوگ بانی سے ملنا چاہتے ہیں ان کو نہیں ملنے دیتے۔

عمران خان کو قید تنہائی میں رکھا گیا ہے، ہماری عدلیہ کا نظام بوسیدہ ہوچکا ہے، جعلی مقدمات میں گھسیٹا جارہا ہے، ہمیں کوئی ایک دفعہ آکے بتائے وہ عمران خان سے کیا چاہتے ہیں؟۔ انہوں نے کہا کہ ہم اپنے بھائی کو جانتے ہیں وہ بہت مضبوط ہے۔ انصاف تو عدالتوں اور ججوں نے دینا ہے، ججوں کو خیال کرنا چاہیے اسے عدلیہ بدنام ہوتی ہے، ہمارے ایک ہزار کے قریب لوگ 26 نومبر کے بعد جیلوں میں ہیں لوگ جیلوں میں ذات کے لیے نہیں بلکہ پاکستان کے لیے ہیں، ایک عدالت ضمانت دیتی ہے دوسری عدالت دوسرے مقدمے میں بلاتی ہے، اپنے اسیروں کے لیے جو کچھ کرسکتے ہیں کریں گے۔