پاکستان ترکیہ کے ساتھ ہر شعبے میں ممکنہ تعاون کے لئے تیار ہے، ڈاکٹر طارق فضل چوہدری

پاکستان ترکیہ کے دو طرفہ تعلقات خاص طور پر تعلیمی میدان میں تعاون کو قدر کی نگاہ سے دیکھتا ہے، وفاقی وزیر

بدھ 26 مارچ 2025 23:29

اسلام آباد (اُردو پوائنٹ اخبارتازہ ترین - این این آئی۔ 26 مارچ2025ء)وفاقی وزیر برائے پارلیمانی امور ڈاکٹر طارق فضل نے کہا ہے کہ پاکستان ترکیہ کے دو طرفہ تعلقات خاص طور پر تعلیمی میدان میں تعاون کو قدر کی نگاہ سے دیکھتا ہے، پاکستان ترکیہ کے ساتھ ہر شعبے میں ممکنہ تعاون کے لئے تیار ہے، پاکستان میں میٹرو بس کا منصوبہ بھی ترکیہ کی بس سروس سے متاثر ہو کر کیا گیا تھا۔

ان خیالات کا اظہار انہوں نے بدھ کو ترکیہ کے سفیر ڈاکٹر عرفان نذیر اوغلو سے ملاقات میں کیا۔ وفاقی وزیر ڈاکٹر طارق فضل نے ترکیہ کے سفیر کا استقبال کیا۔اس موقع پر ترکیہ کے سفیر نے وفاقی وزیر ڈاکٹر طارق فضل کو عہدہ سنبھالنے پر مبارکباد دی۔ ملاقات میں دو طرفہ تعلقات کو بہتر بنانے پر اتفاق رائے کیا گیا۔

(جاری ہے)

وفاقی وزیر ڈاکٹر طارق فضل چوہدری نے کہا کہ ترکیہ نے ہمیشہ پاکستان کا ساتھ دیا ہے، ترکیہ پاکستان کا برادر ملک ہے اور ان کے ساتھ ہمارا روحانی تعلق ہے۔

انہوں نے کہا کہ پاکستان ترکیہ کے دو طرفہ تعلقات خاص طور پر تعلیمی میدان میں تعاون کو قدر کی نگاہ سے دیکھتا ہے، پاکستان ترکیہ کے ساتھ ہر شعبے میں ممکنہ تعاون کے لئے تیار ہے۔ وفاقی وزیر نے کہا کہ پاکستان میں میٹرو بس کا منصوبہ بھی ترکیہ کی بس سروس سے متاثر ہو کر کیا گیا تھا۔ انہوں نے کہا کہ پاکستان اور ترکیہ واحد مسلم ممالک ہیں جن کی افواج مضبوط ہیں۔

ترکیہ کے سفیر نے کہا کہ ترکیہ اور پاکستان اسلامی برادر ملک ہیں، پاکستان اور ترکیہ مل کر ایک مضبوط اور ترقی یافتہ ملک کے طور پر ابٴْھر سکتے ہیں۔ انہوں نے کہا کہ ترکیہ دہشت گردی کی جنگ میں پاکستان کے ساتھ کھڑا ہے، پاکستان اور ترکیہ مل کر دہشت گردی کی جنگ کا مقابلہ کر سکتے ہیں۔ انہوں نے تعلیمی میدان اور ووکیشنل ٹریننگ پروگرامز میں پاکستان سے تعاون کو مزید بڑھانے پر بھی بات چیت کی۔ سفیر ترکیہ نے کہا کہ ترکیہ میں اس وقت 4000 کے قریب پاکستانی طلباء زیرِ تعلیم ہیں، اس تعداد میں اضافے کی ضرورت ہے۔ انہوں نے کہا کہ پاکستان اور ترکیہ میں تجارت کے مواقع کو بڑھانا ہوگا۔