سابق سیکرٹری خارجہ نجم الدین اے شیخ انتقال کرگئے، تقریباً چار دہا ئیوں تک غیر معمولی عزم کے ساتھ پاکستان کی خدمت کی ، ترجمان دفتر خارجہ

جمعہ 28 مارچ 2025 17:07

اسلام آباد(اُردو پوائنٹ اخبارتازہ ترین - این این آئی۔ 28 مارچ2025ء)سابق سیکرٹری خارجہ نجم الدین اے شیخ کراچی میں انتقال کرگئے۔ترجمان دفتر خارجہ کی جانب سے جاری تعزیتی بیان میں کہا گیا کہ وزارت خارجہ ایک ممتاز سفارت کار اور پاکستان کے سابق سیکرٹری خارجہ (1994-1997) کے انتقال کا اعلان کرتی ہے،وہ جمعہ کی صبح 85 سال کی عمر میں کراچی میں اپنے خالق حقیقی سے جا ملے۔

دفتر خارجہ کے مطابق یونیورسٹی آف سندھ اور ٹفٹس یونیورسٹی کے فلیچر سکول آف لا اینڈ ڈپلومیسی کے سابق طالب علم نجم الدین اے شیخ نے اپنی زندگی کی تقریباً چار دہائیاں غیر معمولی عزم اور امتیاز کیساتھ پاکستان کی خدمت کیلئے وقف کیں۔ ان کے شاندار کیرئیر میں جرمنی، کینیڈا، امریکا اور ایران میں بطور سفیر تعیناتیاں شامل ہیں، جہاں انہوں نے مہارت سے پاکستان کے سفارتی مفادات کو آگے بڑھایا۔

(جاری ہے)

سیکرٹری خارجہ کے طور پر انہوں نے اپنی بصیرت انگیز قیادت میں خارجہ پالیسی کو اسٹریٹجک دور اندیشی کے ساتھ تشکیل دیا اور بعد میں آنے والے سفارت کاروں کی رہنمائی کی۔ دفتر خارجہ کے مطابق اپنی سفارتی ذہانت کیلئے مشہور نجم الدین اے شیخ بین الاقوامی تعاون، علاقائی استحکام اور انسانی حقوق کے ثابت قدم حامی تھے۔انہیں اندرون اور بیرون ملک وسیع پیمانے پر عزت دی گئی، ساتھیوں اور ہم منصبوں نے یکساں طور پر ان کی دیانتداری، پیشہ ورانہ مہارت اور پاکستان کے لئے غیر متزلزل لگن کی تعریف کی۔

بیان میں کہا گیاکہ اپنی سفارتی خدمات کے علاوہ انہوں نے انسٹی ٹیوٹ آف اسٹریٹجک اسٹڈیز اسلام آباد کے بورڈ آف گورنرز میں خدمات انجام دیں اور وہ سندھ کونسل آف فارن ریلیشنز کے بانی رکن تھے۔وزارت خارجہ ان کے اہل خانہ، دوستوں اور ان تمام لوگوں سے اپنی گہری تعزیت کا اظہار کرتی ہے جنہیں ان کے ساتھ جاننے اور کام کرنے کا اعزاز حاصل ہیم ان کی خدمت اور مدبرانہ وراثت آئندہ نسلوں کے لئے ایک تحریک کے طور پر قائم رہے گی۔