وزیراعظم کے معاون خصوصی طارق فاطمی کی یو این سیکرٹری جنرل سے ملاقات،کشمیر اور فلسطین سمیت مختلف عالمی امور پر تبادلہ خیال

ہفتہ 29 مارچ 2025 21:45

اسلام آباد (اُردو پوائنٹ اخبارتازہ ترین - این این آئی۔ 29 مارچ2025ء)وزیراعظم کے معاون خصوصی طارق فاطمی نے یو این سیکرٹری جنرل سے ملاقات کی، ملاقات میں کشمیر اور فلسطین سمیت مختلف عالمی امور پر تبادلہ خیال کیا گیا۔طارق فاطمی نے یو این سیکرٹری جنرل کو سلامتی کونسل میں پاکستان کی ترجیحات سے آگاہ کیا، طارق فاطمی نے یو این چارٹر اور امن مشنز میں پاکستان کے دیرینہ عزم کو بھی اجاگر کیا۔

وزیراعظم کے معاون خصوصی نے مقبوضہ کشمیر میں بھارتی تسلط اور کشمیری عوام کے حقِ خودارادیت کی خلاف ورزی سے آگاہ کیا اور کہا کہ بھارتی اقدامات بین الاقوامی قوانین کی صریح خلاف ورزی ہیں۔طارق فاطمی نے سلامتی کونسل کی قراردادوں کے مطابق جموں و کشمیر تنازع کے منصفانہ حل کی ضرورت پر زور دیا۔

(جاری ہے)

وزیراعظم کے معاون خصوصی نے کہا کہ عالمی برادری اسرائیل کو فلسطینی عوام کے خلاف ظلم و جبر اور دہشتگردی کی مہم ختم کرنے کیلئے پابند کرے۔

انہوں نے کہا کہ عالمی برادری فلسطینیوں کو ان کے وطن سے بے دخل کرنے کی کسی بھی تجویز کی بھرپور مخالفت کرے۔طارق فاطمی نے افغانستان سے ہونے والی سرحد پار دہشتگردی کو بھی اجاگر کیا، انہوں نے دہشتگردی کے خلاف اقوامِ متحدہ کی معاونت کی ضرورت پر زور دیا۔یو این سیکرٹری جنرل نے اقوامِ متحدہ میں پاکستان کی فعال شراکت اور عالمی امن و سلامتی کے قیام میں کردار اور امن مشنز میں خدمات کو سراہا۔