عیدمنانے کے بعدپر دیسیوں کی واپسی شروع، موٹر وے پولیس نے ٹریفک بہاؤ کے پیش نظر ٹریول ایڈوائزری جاری

بدھ 2 اپریل 2025 12:10

اسلام آباد (اُردو پوائنٹ اخبارتازہ ترین - اے پی پی۔ 02 اپریل2025ء) عید منانے گئے پردیسیوں کی واپسی شروع، موٹر وے پولیس نے عید کے اختتام پر موٹر ویز اور قومی شاہراہوں پر بڑھتے ہوئے ٹریفک بہاؤ کے پیش نظر ٹریول ایڈوائزری جاری کر دی ۔ترجمان نیشنل ہائی ویز اینڈ موٹروے پولیس کی طرف سے جاری ایڈوائزری میں کہا گیا ہے کہ چند احتیاطی تدابیر اپناتے ہوئے اپنا سفر محفوظ اور آرام دہ بنائیں ۔

سفر شروع کرنے سے پہلے گاڑی کا انجن آئل، پانی، ٹائر پریشر اور بریک چیک کر لیں- دوران ڈرائیونگ سیٹ بیلٹ کا استعمال ،حد رفتار کی پابندی، اگلی گاڑی سے محفوظ فاصلہ اور لین اور لائن کا خیال رکھیں۔ لمبے سفر سے پہلے ڈرائیور کا مکمل فریش ہونا اور دو سے ڈھائی گھنٹے کی ڈرائیونگ کے بعد کچھ وقت آرام کرنا ضروری ہے۔

(جاری ہے)

نیند یا غنودگی کی حالت میں ہرگز ڈرائیو نہ کریں۔

مسافر بردار گاڑیوں میں سفر کرنے والے اوورلوڈنگ اور اوور چارجنگ کی شکایت موٹروے پولیس ہیلپ لائن پر کر سکتے ہیں۔ ممکنہ طور پر بڑھتے ہوئے رش کے پیش نظر موٹروے پولیس کی نفری اور پٹرولنگ میں اضافہ کر دیا گیا ہے۔تمام ٹول پلازہ پر روڈ سیفٹی بریفنگ کا سلسلہ جاری ہے۔ کسی بھی مدد کی صورت میں موٹروے پولیس ہیلپ لائن 130 پر رابطہ کیا جا سکتا ہے ۔ نیشنل ہائی ویز اینڈ موٹروے پولیس آپ کی مدد اور محفوظ سفر کے لیے ہر دم تیار ہے۔