پی ایس ایل میچوں کے دوران راولپنڈی ویسٹ مینجمنٹ کمپنی نے صفائی آپریشن کا آغاز کر دیا

اتوار 6 اپریل 2025 18:00

راولپنڈی (اُردو پوائنٹ اخبارتازہ ترین - اے پی پی۔ 06 اپریل2025ء) راولپنڈی ویسٹ مینجمنٹ کمپنی (آر ڈبلیو ایم سی) کے چیف ایگزیکٹو آفیسر رانا ساجد صفدر نے کہا ہے کہ وزیر اعلیٰ پنجاب مریم نواز کی پی ایس ایل کے میچوں کے دوران صفائی کے حوالے سے خصوصی ہدایات کے تحت راولپنڈی ویسٹ مینجمنٹ کمپنی نے صفائی آپریشن کا آغاز کر دیا ہے۔ انہوں نے کہا کہ پاکستان سپر لیگ کے میچوں کی میزبانی کے لیے راولپنڈی کرکٹ اسٹیڈیم میں صفائی ستھرائی کی تیاریاں عروج پر ہیں۔

11 اپریل کو ہونے والے افتتاحی میچ سمیت تمام 11 میچوں کے لیے صفائی کے لیے خصوصی اقدامات اٹھائے ہیں تا کہ شائقین کرکٹ کو صاف ستھرا اور خوشگوار ماحول فراہم کیا جا سکے۔ انہوں نے بتایا کہ میچوں کے دوران راولپنڈی شہر اور کرکٹ اسٹیڈیم کے ارد گرد صفائی کی صورتحال پر خصوصی توجہ دی جائے گی۔

(جاری ہے)

اس حوالے سے مختلف علاقوں میں ورکروں کی تعیناتی کی جا رہی ہے تا کہ اسٹیڈیم کے اندر اور باہر صفائی کی صورت حال کو بہتر بنایا جا سکے۔

ان اقدامات کا مقصد شائقین کرکٹ کو ایک صاف، خوبصورت اور ماحول دوست تجربہ فراہم کرنا ہے۔ انہوں نے کہا کرکٹ اسٹیڈیم کے داخلی اور خارجی راستوں، پارکنگ ایریا اور شائقین کے بیٹھنے کی جگہوں کو مکمل طور پر صاف رکھا جائے گا۔ اسٹیڈیم کے باہر سڑکوں اور علاقوں کو بھی صاف کیا جائے گا تا کہ کسی قسم کی گندگی نہ ہو۔ ہر میچ کے دوران صفائی کے لیے مخصوص تعداد میں ورکرز تعینات کیے جائیں گے۔

اسٹیڈیم کے مختلف حصوں میں ویسٹ بیگز اور کوڑے دان رکھے جائیں گے تا کہ گندگی کو مناسب طریقے سے جمع کیا جا سکے۔ فوری صفائی کے لیے موبائل ٹیمیں بھی اسٹیڈیم میں موجود ہوں گی جو شائقین کی جانب سے پھینکی گئی گندگی کو فوراً صاف کریں گی۔ انہوں نے کہا خواتین اور بچوں کے لیے صفائی کے خصوصی انتظامات کیے جائیں گے تا کہ ان کے لیے ایک محفوظ اور صاف ماحول فراہم کیا جا سکے۔