سینئر ن لیگی رہنماوں سمیت 24 سابق اراکین اسمبلی کو الیکشن لڑنے کیلئے نااہل قرار

الیکشن کمیشن نے خرم دستگیر خان، محسن شاہنواز رانجھا سمیت قومی اسمبلی کے 10 سابق ارکان، سندھ اسمبلی کے 7 اور بلوچستان اسمبلی کے 7 سابق ارکان کو نااہل قرار دے دیا

محمد علی پیر 7 اپریل 2025 19:39

سینئر ن لیگی رہنماوں سمیت 24 سابق اراکین اسمبلی کو الیکشن لڑنے کیلئے ..

اسلام آباد (اُردو پوائنٹ اخبارتازہ ترین۔ 07 اپریل2025ء) الیکشن کمیشن نے سینئر ن لیگی رہنماوں خرم دستگیر خان، محسن شاہنواز رانجھا سمیت 24 سابق اراکین اسمبلی کو الیکشن لڑنے کیلئے نااہل قرار دے دیا ۔ تفصیلات کے مطابق الیکشن کمیشن آف پاکستان کی جانب سے کئی سینئر سیاستدانوں کو الیکشن لڑنے کیلئے نااہل قرار دے دیا گیا ہے۔ الیکشن کمیشن آف پاکستان نے اثاثوں کی تفصیلات جمع نہ کرانے سے متعلق کیس کا فیصلہ جاری کر دیا۔

میڈیا رپورٹس کے مطابق الیکشن کمیشن کی جانب سے موقف اختیار کیا گیا ہے کہ جن سابق اراکین اسمبلی کو الیکشن لڑنے کیلئے نااہل قرار دیا گیا ہے، یہ وہ رہنما ہیں جو اپنے اثاثے اور گوشواروں کی تفصیلات جمع کروانے میں ناکام رہے۔ الیکشن کمیشن آف پاکستان کی جانب سے تفصیلات فراہم کرتے ہوئے بتایا گیا ہے کہ مالی سال 2022-23ء کے اثاثے اور گوشواروں کی تفصیلات جمع نہ کرانے پر کل 24 سابق اراکین قومی و صوبائی اسمبلی کو نااہل قرار گیا ہے۔

(جاری ہے)

الیکشن کمیشن نے قومی اسمبلی کے 10 سابق ارکین، سندھ اسمبلی کے 7 اور بلوچستان اسمبلی کے 7 سابق اراکین کو ناہل قرار دیا ہے۔ الیکشن کمیشن نے وضاحت کی ہے کہ نااہل قرار دیے گئے سابق اراکین قومی اور صوبائی اسمبلی تفصیلات جمع کرانے تک عام انتخابات، ضمنی انتخابات اور سینیٹ سےالیکشن میں حصہ نہیں لے سکیں گے اور مالی سال 2022-23ء کے اثاثوں کی تفصیلات کے فارم بی جمع نہ کرانے تک یہ اراکین نااہل رہیں گے۔

الیکشن کمیشن نے جن رہنماوں کو نااہل قرار دیا ہے ان میں سابق ایم این ایز خرم دستگیر خان، محسن نواز رانجھا اور محمد عادل ، رانا محمد اسحاق خان، کمال الدین، عصمت اللہ، ثمینہ مطلوب، نصیبہ ، شمیم آرا پنور اور روبینہ عرفان شامل ہیں۔ سندھ سے عدیل احمد ، حزب اللہ بھگیو، ارسلان تاج حسین، عارف مصطفی جتوئی، عمران علی شاہ، علی غلام اور طاہرہ کو نااہل قرار دیا گیا ہے۔ جبکہ بلوچستان سے میر سکندر علی، میر محمد اکبر، سردار یار محمد رند، عبدالرشید عبدالواحد صدیقی، میر حمال اور بی بی شاہینہ کو بھی ناہل قرار دیا گیا ہے۔