خواتین کو بااختیار بنانا پورے معاشرے کو بااختیار بنانے کے مترادف ہے،گورنربلوچستان

بدھ 9 اپریل 2025 23:50

کوئٹہ (اُردو پوائنٹ اخبارتازہ ترین - اے پی پی۔ 09 اپریل2025ء) گورنر بلوچستان جعفرخان مندوخیل نے کہا کہ یہ صدی درحقیقت خواتین کی صدی ہے،ہماری نصف سے زائد خواتین آبادی کا تعاون ہمارے ملک کی ترقی اور خوشحالی میں اہم ہے، خواتین کو بااختیار بنانا دراصل پورے معاشرے کو بااختیار بنانے کے مترادف ہے۔ یہ بات انہوں پاکستان مسلم لیگ ن کی سینئر نائب صدر فاطمہ کاکڑ کی قیادت میں خواتین پر مشتمل وفد سے گورنر ہاؤس کوئٹہ میں گفتگو کرتے ہوئے کہی۔

(جاری ہے)

اس موقع پرگورنربلوچستان جعفرخان مندوخیل نے کہا کہ بلوچستان کے دور افتادہ اضلاع میں رہنے والی خواتین کئی مسائل ومشکلات سے دو چار ہیں لہٰذا انہیں مستقبل کیلئے جدید مہارتوں سے آراستہ کرنے کیلئے معیاری تعلیم اور پیشہ ورانہ تربیت تک رسائی فراہم کرنا ضروری ہے، بحیثیت ایک سیاسی ایکٹویسٹ یہ آپ سب کا قومی فریضہ ہے کہ صوبے کے دورافتادہ اور پسماندہ علاقوں کی خواتین کی ترقی میں مدد و رہنمائی فراہم کریں اور ان کو ضروری مواقع اور وسائل تک رسائی کو ممکن بنانے کیلئے ہر ممکن کوشش کریں تاکہ یہ ثابت ہو سکے کہ ہم سب ملکر ایک مساوی اور روشن مستقبل کی جانب قدم اٹھا رہے ہیں۔