لاہور کیلئے اہم عالمی اعزاز،معاشی تعاون تنظیم (ای سی او) نے سال 2027ء کیلئے سیاحتی دارالحکومت نامزد کردیا

ای سی او کا 25 رکنی وفد 13 اپریل سے لاہور کا دورہ شروع کرے گا،پنجاب کے دارالحکومت اور باغوں کے شہر لاہور کو بھرپور تاریخی، ثقافتی اور سیاحتی ورثے کے پس منظر میں یہ اعزاز دیاجارہا ہے جو کہ پاکستان اور صوبہ پنجاب کیلئے بڑا عالمی اعزاز ہے

فیصل علوی جمعرات 10 اپریل 2025 12:40

لاہور(اردوپوائنٹ اخبار تازہ ترین۔10اپریل 2025) لاہور کیلئے اہم عالمی اعزاز،معاشی تعاون تنظیم (ای سی او) نے سال 2027ءکیلئے سیاحتی دارالحکومت نامزد کردیا ،پنجاب کے دارالحکومت اور باغوں کے شہر لاہور کو اس کے بھرپور تاریخی، ثقافتی اور سیاحتی ورثے کے پس منظر میں یہ اعزاز دیاجارہا ہے جو کہ پاکستان اور صوبہ پنجاب کیلئے بڑا عالمی اعزاز ہے،تفصیلات کے مطابق ای سی او کا 25 رکنی وفد اس سلسلے میں 13 اپریل سے لاہور کا دورہ شروع کرے گا، اس دوران لاہور کو باضابطہ طورپر ’ای سی او ٹورازم کیپٹل‘ نامز د کرنے کا اعلان کیا جائے گا۔

اکنامک کوآرڈینیشن آرگنائزیشن کے سفیر وزیراعلیٰ پنجاب مریم نواز کی دعوت پر لاہور آئیں گے۔وزیراعلیٰ پنجاب کی میزبانی میں ای سی او کی مستقل مندوبین کونسل کا اجلاس سول سیکرٹریٹ میں منعقد ہوگا۔

(جاری ہے)

ای سی او ممالک کا وفد میلہ چراغاں دیکھنے کے علاوہ، والڈ سٹی سمیت دیگر تاریخی مقامات اور سیف سٹیز اتھارٹی کا دورہ بھی کرے گا۔ مہمان وفد کے اعزاز میں گورنر ہاوس میں ظہرانہ بھی دیا جائے گا۔

اس حوالے سے پنجاب کی سینئر صوبائی وزیر پنجاب مریم اورنگزیب نے خیر مقدم کرتے ہوئے کہا ہے کہ لاہور کوای سی او ٹورازم کیپٹل کا اعزاز ملنا ہماری تاریخ وثقافت اور قومی ورثے کے فروغ کے حوالے سے بڑی پیش رفت ہے۔ وزیراعلیٰ مریم نواز لاہور کے تاریخی، تہذیبی، ثقافتی رنگ دنیا کو دیکھانا چاہتی ہیں۔ لاہور کاای سی او ٹورازم کیپٹل نامز دہونا ملک اور صوبے میں عالمی سیاحت کے فروغ کی طرف اہم قدم ثابت ہوگا۔

یاد رہے کہ اس سے قبل ازبکستان کے شہرِ سبز کو یہ اعزاز پہلے مل چکا ہے جبکہ ترکیہ کے مشرقی اناطولیہ کے شہر اَذروم کو 2025 کیلئے ای سی او ٹورازم کیپٹل نامزد کیا گیا ہے۔ای سی او میں ترکیہ، ایران، افغانستان، پاکستان کے علاوہ آذربائیجان، قزاقستان، کرغزستان، تاجکستان، ترکمانستان اور ازبکستان کے ممالک شامل ہیں، ای سی او ہر سال 10 میں سے ایک رکن ملک کے شہر کو اس منفرد اعزاز کیلئے منتخب کرتا ہے۔