تیمرگرہ، سیکورٹی فورسز کا انٹیلی جنس بیسڈ آپریشن،ہائی ویلیو ٹارگٹ سمیت 2 خوارجی ہلاک

تیمر گرہ(اردوپوائنٹ اخبار تازہ ترین۔11اپریل 2025)سیکورٹی فورسز کا ضلع لوئر دیر کے علاقے تیمر گرہ میں انٹیلی جنس بیسڈ آپریشن ، ہائی ویلیو ٹارگٹ خوارجی سمیت 2 خوارجی ہلاک ،پاک فوج کے شعبہ تعلقات عامہ (آئی ایس پی آر) کے مطابق ہلاک ہونے والوں میں مطلوب خارجی حفیظ اللہ بھی شامل ہے، آئی ایس پی آر کاکہنا ہے کہ 10 اور 11 اپریل کی درمیانی شب سیکیورٹی فورسز نے خفیہ اطلاعات کی بنیاد پر ضلع لوئر دیر کے عمومی علاقے تیمرگرہ میں آپریشن کیا۔

شدید فائرنگ کے تبادلے کے بعد 2 خوارج جن میں ایک ہائی ویلیو ٹارگٹ خوارجی حفیظ اللہ عرف کوچوان کو بھی ہلاک کردیا گیا۔دہشت گرد حفیظ اللہ عرف کوچوان سکیورٹی فورسز سمیت معصوم شہریوں پرحملوں میں ملوث تھا۔آئی ایس پی آر کے مطابق خارجی حفیظ اللہ عرف کوچوان قانون نافذ کرنے والے اداروں کو انتہائی مطلوب تھا۔

(جاری ہے)

سیکیورٹی فورسز نے خوارج کی موجودگی کی اطلاع پر آپریشن کیاتھا۔

آپریشن کے دوران سیکیورٹی فورسز نے علاقے کو گھیرے میں لے کر خوارج کے ٹھکانے کو موثر انداز میں نشانہ بنایا۔آئی ایس پی آر کا مزید کہناتھا کہ حکومت نے خارجی حفیظ اللہ کے سر کی قیمت ایک کروڑ روپے مقرر کر رکھی تھی۔ علاقے میں مزید خوارج کی موجودگی کے خدشے کے پیش نظر کلیئرنس آپریشن جاری ہے۔ پاک فوج ملک سے دہشتگردی کے ناسور کے مکمل خاتمے کیلئے پرعزم ہے۔

دریں اثناءوزیراعظم شہباز شریف اور وزیر داخلہ محسن نقوی نے سیکیورٹی فورسز کو خراج تحسین پیش کرتے ہوئے ملک سے دہشت گردی کے مکمل خاتمے تک جنگ جاری رہنے کا عزم کیا۔وزیراعظم شہباز شریف نے نے کہا کہ انسانیت کے دشمنوں کے مذموم عزائم کو اسی طرح خاک میں ملاتے رہیں گے۔ملک سے دہشتگردی کے خاتمے اور قیام امن کیلئے پوری قوم سیکیورٹی فورسز کے ساتھ کھڑی ہے۔

وفاقی وزیر داخلہ محسن نقوی نے بھی کہا ہے کہ سیکیورٹی فورسز نے بروقت کارروائی کرکے خوارجیوں کے ناپاک عزائم کو ناکام بنایا۔ان کا کہنا تھا کہ سیکیورٹی فورسز کی بہادری اور پیشہ وارانہ صلاحیتوں کی قوم معترف ہے۔یاد رہے کہ اس سے قبل سیکورٹی فورسز نے ڈیرہ اسماعیل خان میں خفیہ آپریشن کے دوران سرغنہ سمیت 9خوارجیوں کو ہلاک کر دیاتھا۔پاک فوج کے شعبہ تعلقات عامہ (آئی ایس پی آر) کے مطابق آپریشن کے دوران سیکیورٹی فورسز نے خوارج کے ٹھکانے کو موثر انداز میں نشانہ بنایا تھا۔

ہلاک ہونے والوں میں ایک انتہائی مطلوب خارجی سرغنہ شیرین بھی شامل تھا جبکہ مارے گئے خوارج سے اسلحہ اور گولہ بارود بھی برآمد ہواتھا۔آئی ایس پی آر کے مطابق ڈیرہ اسماعیل خان کے علاقے ٹکوارہ میں خفیہ اطلاعات کی بنیاد پر سیکیورٹی فورسز نے 6 اور 7 اپریل کی درمیانی شب آپریشن کرتے ہوئے 9 خوارج کو ہلاک کیاگیاتھا۔خارجی رنگ لیڈر شیرین قانون نافذ کرنے والے اداروں کو متعدد دہشت گرد کارروائیوں میں ملوث ہونے کی وجہ سے انتہائی مطلوب تھا۔

کئی بے گناہ شہریوں کی ٹارگٹ کلنگ کے ساتھ ساتھ 20 مارچ 2025 کو کیپٹن حسنین اختر شہید کی شہادت میں بھی ملوث تھا۔آئی ایس پی آر سیکیورٹی فورسز نے کامیابی سے دہشت گردوں کے ٹھکانوں کو نشانہ بنایاتھا۔ مارے گئے خوارج سے اسلحہ اور گولہ بارود بھی برآمد کیا گیا تھا۔