پی ٹی آئی کاسیاسی درجہ حرارت کو کم کرنا اور اسٹیبلشمنٹ سے بات کرنا بہت ضروری ہے

اسلام آباد ( اردوپوائنٹ اخبار تازہ ترین۔ آئی پی اے ۔ 11 اپریل 2025ء ) سابق گورنر سندھ عمران اسماعیل نے کہا ہے کہ پی ٹی آئی کاسیاسی درجہ حرارت کو کم کرنا اور اسٹیبلشمنٹ سے بات کرنا بہت ضروری ہے،موجودہ حکومت فارم 47 کے اوپر قائم ہے، ان کو خوف ہے کہ اگر پی ٹی آئی کی بات ہوگئی تو ان کا کیا ہوگا؟ ملکی سیاسی استحکام کیلئے پی ٹی آئی کی بات کرنے کی کوشش کو سراہا جانا چاہیئے۔

انہوں نے ہم نیوز کے پروگرام میں گفتگو کرتے ہوئے کہا کہ پی ٹی آئی کو اس وقت سیاسی درجہ حرارت کو کم کرنے اور اسٹیبلشمنٹ سے بات چیت کرنے کی بہت ضرورت ہے، اگر پی ٹی آئی ایسی کوشش کرتی ہے تو اس کو سراہا جانا چاہیئے کہ وہ ملک کی بہتری اور سیاسی استحکام کیلئے کوشش کررہی ہے۔ن لیگ کو خوف ہے کہ اگر پی ٹی آئی کی اسٹیبلشمنٹ سے بات ہوگئی اور ٹمپریچر کم ہوگیا تو ان کا اپنا کیا ہوگا؟ فارم 47 کے اوپر یہ حکومت قائم ہے، یہ الیکشن جیتے نہیں ہارے ہوئے ہیں، یہ تو 17 سیٹیں بھی نہیں جیت رہے تھے، ان کو خوف ہے، پی ٹی آئی کو اسٹیبلشمنٹ سے بات کرنے کی کوشش بہت پہلے اپنا لینی چاہیئے تھی۔

(جاری ہے)

پی ٹی آئی میں اسد قیصر، اعظم سواتی یا سمجھ بوجھ رکھنے والے لوگوں کو آگے آنا چاہئے اور بات چیت کرنی چاہئے۔میں اگر پی ٹی آئی کا حصہ ہوتا ویسے میں خود کو پی ٹی آئی کا حصہ ہی سمجھتا ہوں، ہم پی ٹی آئی جوائن کرنے والوں میں سے نہیں بلکہ بنانے والوں میں ہیں۔ میں اگر ہوتا تو کوشش کرتا کہ بات اتنی دور تک نہ جائے، پی ٹی آئی کی سیاسی لڑائی ہے ان کی افواج پاکستان کے ساتھ لڑائی نہیں بنتی تھی۔

پی ٹی آئی اگر ہمیں اپنا نہیں بھی مانتی پھر بھی ہم کچھ نہ کچھ ضرور کریں گے۔دوسری جانب پروگرام میں وزیرمملکت کھیل داس کوہستانی نے گفتگو کرتے ہوئے کہا کہ ڈٹ کے لیٹا ہوا ہے کپتان، اعظم سواتی وہی شخص ہے جو اسٹیبلشمنٹ پر جھوٹے الزامات لگاتا تھا، رو کر ڈرامہ رچایا اور ویڈیو بھی بنائی تھی۔آج یہ شخص بات چیت کیلئے پاؤں پکڑ رہا ہے ۔حکومت کی ترجیح اور فوکس پاکستانی معیشت کی ترقی و خوشحالی پر ہے۔

عمران خان کے قانونی معاملات ہیں، عمران خان کو سزائیں عدالتوں نے دی ہیں، ان کو اپنی بے گناہی بھی عدالتوں میں ہی ثابت کرنا ہے، ہماری ان سے کوئی ذاتی دشمنی نہیں ہے، وہ عدالتوں میں جاکر خود کو بے گناہ ثابت کریں۔عمران خان پر جو سنگین الزامات اور سزائیں ہیں ان کا مجھے دور دور تک باہر آنا نظر نہیں آرہا۔میرا خیال ہے کہ بانی کی رہائی کیلئے بات معافی سے آگے نکل چکی ہے۔پی ٹی آئی کا احتجاج کرنا اورباہر لابنگ کروانااس کا مقصد اسٹیبلشمنٹ کو دباؤ میں لانا ہے ، لیکن اسٹیبلشمنٹ ملک کا اثاثہ ہے وہ آئین کے مطابق چلتا ہے۔ اسٹیبلشمنٹ نے کھل کر کہا ہے کہ ان کا سیاست اور سیاسی معاملات سے کوئی تعلق نہیں ہے۔