زرداری کی ذہنی حالت ٹھیک نہیں، انہوں نے نہروں کی منظوری خود دی،بیرسٹرسیف

پیپلز پارٹی نہروں کے معاملے پر صرف ووٹ بچانے کی کوشش کر رہی ہے، ترجمان پختونخوا حکومت

ہفتہ 12 اپریل 2025 15:44

زرداری کی ذہنی حالت ٹھیک نہیں، انہوں نے نہروں کی منظوری خود دی،بیرسٹرسیف

پشاور(اُردو پوائنٹ اخبارتازہ ترین - این این آئی۔ 12 اپریل2025ء)ترجمان خیبر پختونخوا حکومت بیرسٹر سیف نے کہا ہے کہ صدر آصف زرداری کی ذہنی حالت ٹھیک نہیں، انہوں نے نہروں کی خود منظوری دی ہے۔دریائے سندھ سے نہریں نکالنے کے معاملے پر اپنے بیان میں ترجمان خیبر پختونخوا حکومت بیرسٹر سیف نے کہا کہ نہروں کے معاملے پر صدر زرداری نے یا تو سندھ کے عوام کی پیٹھ میں چھرا گھونپا ہے یا ان کی یادداشت جواب دے گئی ہے۔

انہوں نے کہا کہ پیپلز پارٹی دونوں باتوں میں سے ایک کو مانے،دونوں کی ایک ساتھ تردید ممکن نہیں،اگر آصف زرداری کی ذہنی حالت ٹھیک نہیں تو وہ اعلی ترین عہدے پر کیوں براجمان ہیں فوری مستعفی ہوں،انہیں اپنی جسمانی اور ذہنی حالت کی وجہ سے خود مستعفی ہو جانا چاہیے۔

(جاری ہے)

بیرسٹر سیف نے کہاکہ پیپلز پارٹی نہروں کے معاملے پر صرف ووٹ بچانے کی کوشش کر رہی ہے، نہروں کی منظوری خود صدر آصف علی زرداری نے دی،یہی وجہ ہے کہ آصف زرداری کی منظوری اور بلاول بھٹو کی مخالفت سمجھ سے بالاتر ہے۔

انہوں نے کہا کہ پیپلز پارٹی احتجاج کا ڈراما رچا کر ووٹ بینک بچانے کی کوشش کر رہی ہے، نہروں کا معاملہ سب سے پہلے پاکستان تحریک انصاف نے اٹھایا تھا،بلاول بھٹو احتجاج کے بجائے اپنے والد سے پوچھیں کہ نہروں کی منظوری کیوں دی ۔