18 افریقی ماہرینِ امراض چشم کا ذیابیطس سے متعلقہ آنکھوں کی بیماری اور گلوکوما کے علاج کا ایک سالہ خصوصی تربیت مکمل

e اسلام آباد(اُردو پوائنٹ اخبارتازہ ترین - آن لائن۔ 13 اپریل2025ء)پاکستان میں اسلامی تعاون تنظیم کی قائمہ کمیٹی برائے سائنس و ٹیکنالوجی (کامسٹیک) کے زیر اہتمام 18 افریقی ماہرینِ امراض چشم نے ذیابیطس سے متعلقہ آنکھوں کی بیماری (Diabetic Retinopathy) اور گلوکوما کے علاج پر مبنی پاکستان میں ایک سالہ خصوصی تربیت مکمل کرلی ہے۔ یہ پروگرام اسلامی تعاون تنظیم (او آئی سی) کے رکن ممالک کے درمیان صحت اور سائنس و ٹیکنالوجی کے شعبوں میں تعاون کو مضبوط کرنے کا ا اہم سنگِ میل ثابت ہوگا۔

ایک سالہ خصوصی تربیتی پروگرام کامسٹیک، اسلامی ترقیاتی بینک، ایل -آر- بی- ٹی اور یونیورسٹی آف لاہور کے باہمی اشتراک سے مکمل ہوا۔تربیت مکمل کرنے والے ماہرین کو جدید مشینری استعمال کرنے، آپریشن، سرجری، فنڈس کیمرے اور لیزر تھراپی کی مکمل تربیت فراہم کی گئی تربیت مکمل کرنے والے شرکاء کو اسناد تقسیم کرنے کی تقریب سے خطاب کرتے ہوئے کامسٹیک کے کوآرڈینیٹر جنرل پروفیسر ڈاکٹر محمد اقبال چوہدری نے کہا کہ ’’یہ اقدام او آء سی کے رکن ممالک کے مقامی ماہرین صحت، سائنسدانوں اور ڈاکٹرز کو خود کفیل بنانے اور اپنی صلاحیتوں پر انحصار کرکے اپنے ممالک کی عام عوام کی خدمت کرنے کے قابل بنانے کے لیے کامسٹیک کے عزم کا عملی نمونہ ہے۔

(جاری ہے)

انہوں نے مزید کہا کہ یہ محض تربیتی پروگرام نہیں بلکہ افریقہ میں آنکھوں کی امراض میں مبتلا افراد کی بہترین دیکھ بھال کے لیے مستقبل کی سرمایہ کاری ہی'' تربیت مکمل کرنے والے شرکا میں سے ایک رکن نے اپنے خیالات کا اظہار کرتے ہوئے کہا کہ ’’یہ تربیت نہ صرف ہمارے کلینیکل مہارتوں میں اضافے کا سبب بنی بلکہ ہمیں یہ سکھایا کہ مقامی سطح پر باہمی اشتراک کے ذریعے کیسے پائیدار تبدیلی ممکن بنائی جا سکتی ہے۔

‘‘یہ اقدام بین الاقوامی کوششوں سے ہم آہنگ ہے جس کا مقصد قابلِ علاج اندھاپن کو مقامی صلاحیتوں کے فروغ کے ذریعے کم کرنا ہے۔ اس پروگرام کے ذریعے افریقی اور پاکستانی اداروں کے مابین طویل مدتی شراکت داری کی راہ بھی ہموار ہوئی ہے۔کامسٹیک اپنے رکن ممالک کے سائنسدانوں کی استعداد کار بڑھانے، طلبہ و طالبات کو اسکالرشپس دینے، سائنسی تعاون فروغ دینے اور جدید ٹیکنالوجیز کی تربیت فراہم کرنے کے لیے پرعزم ہے۔