امریکی کانگریس کے وفد کی ملاقات، آرمی چیف کا امریکہ کے ساتھ شراکت داری مزید مضبوط بنانے کے عزم کا اعادہ

ملاقات میں باہمی دلچسپی کے مختلف امور پر تبادلہ خیال، علاقائی سلامتی اور دفاعی تعاون کے شعبوں پر بطور خاص غور کیا گیا؛ آئی ایس پی آر

ساجد علی اتوار 13 اپریل 2025 21:05

امریکی کانگریس کے وفد کی ملاقات، آرمی چیف کا امریکہ کے ساتھ شراکت داری ..

راولپنڈی ( اُردو پوائنٹ اخبارتازہ ترین۔ 13 اپریل 2025ء ) پاکستان کے دورے پر آئے ہوئے امریکی کانگریس کے وفد نے آرمی چیف جنرل سید عاصم منیر سے ملاقات کی، جیک برگمین کی سربراہی میں تھامس سوزی اور جوناتھن جیکسن پر مشتمل امریکی کانگریس کے وفد نے آرمی چیف جنرل سید عاصم منیر سے کے دوران باہمی دلچسپی کے متعدد امور پر تفصیلی تبادلہ خیال کیا، جس میں بالخصوص علاقائی سلامتی اور دفاعی تعاون پر زور دیا گیا۔

مسلح افواج کے شعبہ تعلقات عامہ (آئی ایس پی آر) کے مطابق دونوں جانب سے باہمی احترام، مشترکہ اقدار اور سٹریٹجک مفادات کے تحت رابطوں اور رعاون کی اہمیت پر زور دیا گیا، دورے پر آئے ہوئے امریکی قانون سازوں نے دہشت گردی کے خلاف جنگ میں اہم کردار ادا کرنے پر پاکستان کی مسلح افواج کی تعریف کی اور علاقائی امن و استحکام کے لئے پاکستان کی لازوال خدمات کا بھی اعتراف کیا، انہوں نے اس حوالے سے پاکستان کی سٹریٹجک اہمیت اور عوام کے عزم کی بھی تعریف کی۔

(جاری ہے)

آئی ایس پی آر نے بتایا کہ پاکستان کی خودمختاری کے لیے احترام کو اجاگر کرتے ہوئے امریکی کانگریس کے وفد نے وسیع البنیاد دوطرفہ تعاون بالخصوص سلامتی، تجارت، سرمایہ کاری اور اقتصادی ترقی کے شعبوں میں آگے بڑھانے کے لئے مضبوط عزم کا اظہار کیا، جب کہ آرمی چیف جنرل سید عاصم منیر نے وفد کے دورے کو سراہا اور پاکستان کی امریکہ کے ساتھ اپنی دیرینہ شراکت داری کو مزید گہرا اور وسعت دینے کی خواہش کے عزم کا اعادہ کیا، ایسی شراکت داری جو باہمی طور پر مفید اور ایک دوسرے کے قومی مفادات کا احترام کرے، ملاقات کے دوران انفارمیشن ٹیکنالوجی کے شعبے میں تربیتی تعاون کے لئے مفاہمت کی یادداشتوں پر بھی دستخط کیے گئے۔