ننیشنل انسٹٹیوٹ پشاور کے 37 ویں سینئر مینجمنٹ کورس کے شرکاء کا ٹریفک ہیڈ کوارٹر کا دورہ

پیر 14 اپریل 2025 09:00

پشاور (اُردو پوائنٹ اخبارتازہ ترین - اے پی پی۔ 14 اپریل2025ء) نیشنل انسٹیٹیوٹ آف مینجمنٹ پشاور کے 37 ویں سینئر مینجمنٹ کورس کے شرکاء نے سٹی ٹریفک پولیس پشاور کے ہیڈ کوارٹر کا دورہ کیا۔ دورے کے موقع پر کورس کے شرکاء نے رب نواز خان کی سربراہی میں چیف ٹریفک آفیسر ہارون رشید خان سے ملاقات کی۔ وفد میں ڈاکٹر واجد علی، عصرہ تسنیم، محمد طیب،شاہ سعود، فہد وزیر،سیراج منیر،شاکر محمد، خالد محمود اور محمد نیاز شامل تھے۔

چیف ٹریفک آفیسر ہارون رشید خان نے کورس کے شرکاء کو سٹی ٹریفک پولیس پشاور کے کمانڈ اینڈ کنٹرول روم' ایف ایم ریڈیو 88.6 اور لائسنس برانچ کا دورہ کرایا اور تفصیلی بریفنگ دی۔ اسی طرح سٹی ٹریفک پولیس پشاور کی جانب سے چالان' ٹریکر اور دیگر نظام بارے آگاہ کیا۔

(جاری ہے)

چیف ٹریفک آفیسر ہارون رشید خان نے کہا کہ سٹی ٹریفک پولیس پشاور کی جانب سے شہریوں کو ٹریفک نظام سے متعلق یوٹیوب' فیس بک اور ٹوئٹر پر بھی آگاہی دی جاتی ہے تاکہ انہیں کسی قسم کے مشکلات درپیش نہ ہوں۔

انہوں نے مزید کہا کہ سٹی ٹریفک پولیس پشاور نے گاڑیوں میں ٹریکر لگادیئے ہیں اسی طرح کمپیوٹرائزڈ ڈیوٹی روسٹر بھی فعال کردیا گیا ہے جس کے ذریعے پوائنٹس پر ہر ماہ ٹریفک افسران کو تبدیل کیا جاتا ہے اور باقاعدہ انہیں میسج کے ذریعے آگاہ کیا جاتا ہے۔ انہوں نے مزید کہا کہ سٹی ٹریفک پولیس پشاور کی جانب سے ای پیٹرولنگ سسٹم کے تحت ٹریفک افسران کی گاڑیوں میں کیمرے لگائے گئے ہیں جس میں باقاعدہ ریکارڈنگ ہوتی ہے جس کا سارا ریکارڈ کمانڈ اینڈ کنٹرول روم میں ہوتا ہے جس کی افسران از خود نگرانی کرتے ہیں اور جہاں کہیں بھی ٹریفک جام یا دیگر مسائل پیش آتے ہیں اس کے فوری حل کیلئے اقدامات کئے جاتے ہیں اسی طرح آئی ٹی اصلاحات کے تحت ای چالان سسٹم کے ذریعے بار بار ٹریفک قوانین کی خلاف ورزی کرنیوالوں کے بارے میں با آسانی آگاہی حاصل ہوسکتی ہے جس کے خلاف قانون کے مطابق کارروائی کر کے ڈرائیونگ لائسنس منسوخ کیا جاتا ہے۔

37 ویں مڈ کیرئیر مینجمنٹ کورس کے شرکاء نے سٹی ٹریفک پولیس پشاور کی جانب سے کئے جانیوالے اقدامات کو سراہا اور چیف ٹریفک آفیسر ہارون رشید خان کاشکریہ ادا کیا۔ اس موقع پر چیف ٹریفک آفیسر ہارون رشید خان نے کورس کے شرکاء کو سٹی ٹریفک پولیس پشاور کی جانب سے شیلڈز پیش کئے۔