وفاقی وزیرمواصلات عبدالعلیم خان سے خواجہ سعد رفیق کی ملاقات

پیر 14 اپریل 2025 21:13

اسلام آباد (اُردو پوائنٹ اخبارتازہ ترین - اے پی پی۔ 14 اپریل2025ء) صدر استحکام پاکستان پارٹی اور وفاقی وزیر مواصلات عبدالعلیم خان سے مسلم لیگ (ن )کے سینئر رہنما اور سابق وفاقی وزیر خواجہ سعد رفیق نے لاہور میں ملاقات کی جس میں دونوں رہنماؤں نے موجودہ ملکی و سیاسی صورتحال پر تبادلہ خیال کیا اور مضبوط معیشت، سرمایہ کاری اور اہم ملکی امور پر بھی بات چیت ہوئی۔

وفاقی وزیر مواصلات عبدالعلیم خان نے ملاقات میں گفتگو کرتے ہوئے کہا کہ ملک درست سمت میں گامزن ہے، درپیش مسائل حل ہونا شروع ہو گئے ہیں اور ملک مثبت پیشرفت کی طرف تیزی سے رواں دواں ہے۔ انہوں نے کہا کہ دن بدن ملکی و غیر ملکی سرمایہ کاروں کے اعتماد میں اضافہ ہو رہا ہے اور انشاء اللہ آئندہ برسوں میں معیشت کے "ٹیک آف "کرنے کا وقت ہے۔

(جاری ہے)

وفاقی وزیر مواصلات عبدالعلیم خان اور لیگی رہنما خواجہ سعد رفیق نے حکومت کو کامیابیوں پر خراج تحسین پیش کرتے ہوئے کہا کہ استحکام پاکستان پارٹی اور مسلم لیگ ن کے مابین سیاسی شراکت جاری رہے گی۔

خواجہ سعد رفیق نے اپنی گفتگو میں کہا کہ وفاقی حکومت بلوچستان اور خیبر پختونخوا میں امن و امان قائم کرنے کے لئے سنجیدہ ہے۔ملاقات میں استحکام پاکستان پارٹی پنجاب کے جنرل سیکرٹری اور ممبر پنجاب اسمبلی شعیب صدیقی اور مسلم لیگ ن کے رہنمائوں، سابق ایم پی اے میاں نصیر احمد بھی موجود تھے۔