Live Updates

’ہم بوڑھے ہوگئے لیکن 43، 45 سالہ کرکٹرز پی ایس ایل کھیل رہے ہیں‘، عمر اکمل بورڈ کے عمر کی بنیاد پر امتیاز برتنے پر بھڑک اُٹھے

کچھ سینئرز کرکٹرز صرف پی ایس ایل کھیلنے کے لیے خود کو تیار کرتے ہیں اور نوجوان ٹیلنٹ کو موقع نہیں ملتا : قومی کرکٹر

ذیشان مہتاب بدھ 16 اپریل 2025 13:00

’ہم بوڑھے ہوگئے لیکن 43، 45 سالہ کرکٹرز پی ایس ایل کھیل رہے ہیں‘، عمر ..

لاہور (اردو پوائنٹ تازہ ترین اخبار ۔ 16 اپریل 2025ء ) ٹیسٹ کرکٹر عمر اکمل خود کو ٹیم میں شامل نہ کرنے پر پھٹ پڑے اور پاکستان کرکٹ بورڈ (پی سی بی) کو شدید تنقید کا نشانہ بنا ڈالا۔

اپنے یوٹیوب چینل پر عمر اکمل نے الزام لگایا کہ پی سی بی کی جانب سے کھلاڑیوں کے انتخاب میں عمر کی بنیاد پر امتیاز برتا جا رہا ہے۔

عمر اکمل کا کہنا تھا کہ ان سمیت احمد شہزاد اور صہیب مقصود کو صرف اس وجہ سے نظرانداز کیا جا رہا ہے کیونکہ وہ 34 سال کے قریب ہیں جب کہ اس سے بڑی عمر کے کھلاڑی اب بھی کھیل رہے ہیں۔

عمر اکمل نے کہا کہ ہمیں بتایا جاتا ہے کہ ہم بہت بوڑھے ہوگئے ہیں، نہ کھیل سکتے ہیں اور نہ ہی مینٹور بننے کے قابل ہیں، لیکن 43، 45 سال کے کھلاڑی اب بھی کھیل رہے ہیں، ایسے میں ہم کیا کریں خود کو گولی مارلیں؟۔

(جاری ہے)

عمر اکمل نے فٹنس ٹیسٹ کے معیار پر بھی تنقید کرتے ہوئے کہا کہ کچھ سینئر کھلاڑی اور کوچز نے کبھی فٹنس ٹیسٹ دیے ہی نہیں۔

عمر اکمل نے شعیب ملک پر تنقید کی اور کہا کہ کچھ سینئرز کرکٹرز صرف پی ایس ایل کھیلنے کے لیے خود کو تیار کرتے ہیں اور نوجوان ٹیلنٹ کو موقع نہیں ملتا۔ ان کا کہنا تھا کہ پی ایس ایل میں جب معروف کھلاڑیوں کو نہیں کھلایا جائے گا تو شائقین کیوں اسٹیڈیم آئیں گے؟۔

عمر اکمل نے بابر اعظم کو بھی مشورہ دیتے ہوئے کہا کہ اسے نمبر 3 پر بیٹنگ کرنی چاہیے، بابر بہترین کرکٹر ہے لیکن اگر وہ کارکردگی بہتر نہیں کرے گا تو مسائل کا سامنا ہو سکتا ہے، پی ایس ایل 10 اس کے کیریئرکے لیے اہم موقع ہے۔