یہ ہسپتال نہ صرف گوادر بلکہ پورے مکران ڈویژن کے لیے ایک عظیم نعمت ہے، جہاں عالمی معیار کے مطابق مفت علاج و معالجہ فراہم کیا جا رہا ہے۔ ڈی جی

کوئٹہ (اُردو پوائنٹ اخبارتازہ ترین - اے پی پی۔ 16 اپریل2025ء) ڈائریکٹر جنرل گوادر ڈویلپمنٹ اتھارٹی سیف اللّٰہ کھیتران نے کہاہے کہ یہ ہسپتال نہ صرف گوادر بلکہ پورے مکران ڈویژن کے لیے ایک عظیم نعمت ہے، جہاں عالمی معیار کے مطابق مفت علاج و معالجہ فراہم کیا جا رہا ہے۔ان خیالات کااظہارانہوں بدھ کو جی ڈی اے پاک چائنا فرینڈشپ ہسپتال کے دورے کے موقع پر بات چیت کرتےہوئے کیا جو گوادر انڈس ہاسپٹل اینڈ ہیلتھ نیٹ ورک کے زیر انتظام خدمات انجام دے رہا ہے۔

دورے کے دوران ڈی جی نے ہسپتال کے مختلف شعبہ جات کا جائزہ لیا، مریضوں سے ملاقات کی اور فراہم کی جانے والی طبی سہولیات پر اطمینان کا اظہار کیا۔ہیڈ آف کیمپس ڈاکٹر عفان فائقزادہ نے ڈی جی کو ہسپتال کی سرگرمیوں، آپریشنز، علاج کے نظام اور دستیاب سہولیات سے متعلق تفصیلی بریفنگ دی۔

(جاری ہے)

ڈائریکٹر جنرل کو آگاہ کیا گیا کہ یومیہ بنیاد پر تقریباً ایک ہزار مریض ہسپتال سے استفادہ کرتے ہیں۔

انہیں مفت ادویات، لیبارٹری ٹیسٹ، سرجری، کنسلٹنسی اور دیگر طبی خدمات میسر آتی ہیں۔دورے کے موقع پر ڈی جی گوادر کو بتایا گیا کہ ہسپتال میں جدید لیبارٹری کی سہولیات دستیاب ہیں جہاں ہر قسم کے ٹیسٹ جدید طبی آلات کے ذریعے انجام دیے جا رہے ہیں۔ اسی طرح ریڈیالوجی ڈیپارٹمنٹ میں گوادر میں پہلی مرتبہ سی ٹی اسکین (CT Scan) کی سہولت متعارف کرائی گئی ہے، جو کہ ایک انقلابی پیش رفت ہے۔

ہسپتال میں اس وقت مختلف اسپیشلسٹ اور کنسلٹنٹس خدمات انجام دے رہے ہیں جن میں گائناکولوجی، پیڈیئٹرکس (بچوں کی طب، میڈیسن ، ایمرجنسی میڈیسن، ریڈیالوجی، آرتھوپیڈک سرجری، جنرل سرجری، امراضِ جلد، پیتھالوجی اور دیگر شعبے شامل ہیں اور عوام کو مفت علاج، تشخیص اور دوائیوں کی فراہمی جیسے سہولیات فراہم کر رہے ہیں۔ڈی جی جی ڈی اے کو یہ بھی بتایا گیا کہ جلد ہی ہسپتال میں مزید اہم شعبہ جات بھی قائم کیے جا رہے ہیں جن میں گیسٹرو انٹرالوجی، کارڈیالوجی (امراضِ قلب) اور نیورولوجی (امراضِ دماغ و اعصاب) شامل ہیں۔

ان شعبوں کے قیام سے ہسپتال کی خدمات کا دائرہ مزید وسیع ہوگا اور علاقے کے لوگوں کو بڑے شہروں کی طرف جانے کی ضرورت مزید کم پڑے گی جو کہ ماضی میں معمولی بیماریوں کے لیے کراچی یا تربت جانے کا رجحان عام تھا، مگر اب گوادر میں معیاری علاج دستیاب ہونے سے یہ رجحان کم ہو چکا ہے۔دورے کے دوران ڈی جی نے ہسپتال میں نئے قائم کردہ شعبہ امراضِ جلد کا افتتاح بھی کیا۔

انہوں نے اس بات پر اطمینان ظاہر کیا کہ ہسپتال تمام شعبہ جات میں بتدریج توسیع پا رہا ہے اور عوام کی خدمت کا سلسلہ وسعت اختیار کر رہا ہے۔ڈی جی نے پاک چائنا فرینڈشپ ہسپتال کو سی پیک کا ایک فلیگ شپ منصوبہ قرار دیتے ہوئے کہا کہ مستقبل میں یہاں میڈیکل کالج، میڈیکل اسکول اور دیگر طبی تعلیمی ادارے قائم کیے جائیں گے، تاکہ مقامی نوجوان نہ صرف باعزت روزگار حاصل کریں بلکہ دکھی انسانیت کی خدمت جیسے عظیم شعبے سے بھی منسلک ہو سکیں۔

ہیڈ آف کیمپس نے ہسپتال کے لیے علیحدہ بجلی فیڈر کی تنصیب میں تاخیر سے متعلق ڈی جی کو آگاہ کیا۔ بتایا گیا کہ ہسپتال کا لوڈ تقریباً 2 میگاواٹ ہے، جس کے لیے کیسکو کو باقاعدہ درخواست اور ادائیگی کی جا چکی ہے، مگر اب تک فیڈر کی تنصیب مکمل نہیں ہو سکی جس سے بعض شعبے مکمل طور پر فعال نہیں ہو پا رہے۔ڈی جی جی ڈی اے نے یقین دہانی کرائی کہ وہ اس اہم مسئلے کو صوبائی حکومت اور کیسکو کے اعلیٰ حکام کے ساتھ اٹھائیں گے، تاکہ ہسپتال کی کارکردگی متاثر نہ ہو اور گوادر کے عوام کو صحت کی سہولیات کی بلا تعطل فراہمی جاری رہے۔

ڈی جی گوادر سیف اللّٰہ کھیتران نے کہا کہ یہ ہسپتال نہ صرف گوادر بلکہ پورے مکران ڈویژن کے لیے ایک عظیم نعمت ہے، جہاں عالمی معیار کے مطابق مفت علاج و معالجہ فراہم کیا جا رہا ہے۔