غزہ فلسطین میں اسرائیلی کھلی برابریت پر امت مسلمہ کو یکجا ہو کر عالمی سطح پر اس مسئلہ کو حل کروانا ہو گا،علما و مشائخ

سرگودھا(اُردو پوائنٹ اخبارتازہ ترین - این این آئی۔ 18 اپریل2025ء)سرگودھا کے علما و مشائخ نے کہاہے کہ غزہ فلسطین میں اسرائیلی کی کھلی برابریت پر احتجاج کرتے ہوئے امت مسلمہ کو یکجا ہو کر عالمی سطح پر اس مسئلہ کو حل کروانا ہو گا اور مسلمانوں کو فلسطین سے مکمل اظہار یکجہتی کیلئے اسرائیلی مصنوعات کے بائیکاٹ میں بھرپور کردار ادا کرنا ہو گا ، ملک سے دہشت گردی، مہنگائی،سودی نظام، بلاجواز ٹیکسوں کے خاتمہ کیلئے ملکی ترقی اور خوشحالی کی راہیں ہموار ہونے کیلئے پوری قوم کو افواج پاکستان اور اداروں کے ساتھ کھڑی ہے۔

تفصیلات کے مطابق جمعیت اشاعت اہلسنت والسنہ کے صوبائی نائب امیر علامہ محمد عطا اللہ بندیالوی، مرکزی جمعیت اہلحدیث پنجاب کے سرپرست اعلیٰ علامہ سید محمد سبطین شاہ نقوی، انٹرنیشنل ختم نبوت پنجاب کے صدر قاری احمد علی نریم، قومی امن کمیٹی برائے بین المذاہب ہم آہنگی کے ضلعی صدرمفتی شاہد مسعود،چیئرمین حافظ وقاص قاسمی،مرکزی اتحاد العلما کے ضلعی جنرل سیکرٹری مولانا ملک ضیا الحق،ضلعی سیکرٹری اطلاعات شیخ نعیم طاہر، ضلعی کنونئیر قاری عبدالوحید،متحدہ علما کونسل کے قاری وقار احمد عثمانی ،امیر افضل اعوان، مسجد رابعہ کے خطیب پروفیسر مولانا فضل الحق بندیالوی،مسجد حامد علی شاہ کے مولانا نگاہ مصطفی چشتی،جامع مسجد شمشیر ٹان کے خطیب مولانا انعام اللہ جلالی اوردیگر علما و مشائخ نے غزہ فلسطین میں نہاتے مسلمان بھائیوں پر اسرائیل کی کھلی بربریت کی پرزور مذمت کرتے ہوئے کہا کہ اسلامی ممالک کو یکجا ہو فلسطینوں سے اظہار یکجہتی کرتے ہوئے اس مسئلہ کو عالمی سطح پر حل کروانے کے لئے اپنا بھرپور کردار ادا کرنا ہو گا اور اسرائیلی مصنوعات کے بائیکاٹ کے لئے ہم مسلمان کو مجاہد بن کر اپنا کام کرنا ہو گا۔

(جاری ہے)

انہوں نے تحفظ ناموس رسالتﷺ اور عظمت صحابہؓ آرڈیننس پر سختی سے عمل درآمد کو یقینی بنانے اور قران وسنت کے تابع نظام شریعت کے فل الفور نفاذ کے لئے قانون سازی پر زور دیتے ہوئے کہا کہ دہشتگردی، مہنگائی، سودی نظام اور ٹیکسوں کے خاتمہ پر ملک خوشحالی اور ترقی کی راہ پر گامزن ہو گا،اس لئے ہر پاکستانی پر زمہ داری عائد ہوتی ہے کہ وہ توحید و سنت کے پرچار کے ساتھ غیر اسلامی رسومات کو ترک کر کے نونہالان وطن کو دنیاوی تعلیم کے ساتھ دینی تعلیم کی طرف راغب کریں تودنیا و آخرت میں کامیاب و کامران سے مستفید ہوں گے۔

انہوں نے کہا کہ ملک سے دہشتگردی کے خاتمہ کیلئے پوری قوم افواج پاکستان اور اداروں کے شانہ بشانہ کھڑی ہے۔اس موقع پر ملک میں امن وامان اور بھائی چارے کے ساتھ اسلام کی سربلندی، ملک کی سلامتی، فلطسین و کشمیر کی آزادی اورامت مسلمہ و شہیدا فلسطین کیلئے خصوصی دعائیں کی گئیں۔