Live Updates

امریکا سے مالی امداد اور سوشل میڈیا کو کنٹرول کرنے کی ذمہ داری علیمہ خانم کے پاس ہے

میرے خلاف ایک منصوبہ بندی کے تحت میڈیا پرسنز اور یوٹیوبرز کو متحرک کیا گیا، علیمہ خانم مجھے اپنے گروپ میں شامل کرنا چاہتی تھی، میری شکایت پر بانی نے کہا کہ علیمہ کا پارٹی معاملات سے کوئی تعلق نہیں ہے۔رکن قومی اسمبلی پی ٹی آئی شیرافضل مروت

ثنااللہ ناگرہ جمعہ 18 اپریل 2025 21:00

اسلام آباد ( اردوپوائنٹ اخبار تازہ ترین۔ آئی پی اے ۔ 18 اپریل 2025ء ) پی ٹی آئی کے رکن قومی اسمبلی شیرافضل مروت نے علیمہ خان پر الزام عائد کیاکہ امریکا سے مالی امداد اور سوشل میڈیا کو کنٹرول کرنے کی ذمہ داری علیمہ خانم کے پاس ہے،میرے خلاف ایک منصوبہ بندی کے تحت میڈیا پرسنز اور یوٹیوبرز کو متحرک کیا گیا، میں نے عمران خان کو علیمہ خان کی شکایت کی تو بانی نے ہدایت کی کہ علیمہ کا پارٹی معاملات سے کوئی تعلق نہیں ہے۔

انہوں نے سماء نیوز کے پروگرام میں گفتگو کرتے ہوئے کہا کہ 8 فروری 2024 تک میں پی ٹی آئی کا ہیرو تھا اور میرے نام کی جے جے کار ہورہی تھی، اس کے بعد الیکشن ہوگئے اور میں فارغ ہوگیا، الیکشن کے فوری بعد جب یہ سیاسی قیادت باہر آئی تو میں نے عمران خان کے ساتھ ملاقاتیں شروع کروائیں، جو ان کی پہلی ملاقات ہوئی ، پہلی ملاقات میں ہی عمران خان کے سامنے میرے خلاف شکایات کا پنڈورا باکس کھول دیا گیا۔

(جاری ہے)

پہلی بار لب کشائی کررہا ہوں ، میرے خلاف ایک منصوبہ بندی کے تحت کچھ لوگوں نے اندر اور کچھ لوگوں نے باہر کردار ادا کیا۔ سب سے پہلے ایک شخص حیدر مہدی تھا ، جو باہر بیٹھا ہے ، ایک غدار ہے اور ایک کورٹ مارشل ہوا پڑا شخص ہے، پہلے ٹیکسی چلاتا تھا اب یوٹیوب، اس نے میرے خلاف یوٹیوب پر وی لاگ کیا، یہ وی لاگ ایسی شخصیت کی ایماء پر کیا گیا جس کا میں بہت احترام کرتا تھا۔

مجھ پر اسٹیبلشمنٹ کا آدمی ہونے کا بیانیہ علیمہ خانم نے متعارف کروایا، اور اس کو ہوا دی کہ میں اسٹیبلشمنٹ کا آدمی ہوں۔یہ بہت سارے میڈیا پرسنز اور یوٹیوبرز کو بلاکر میرے خلاف کان بھرتی تھی، وجہ یہ تھی میں نے علیمہ خانم یا بشریٰ بی بی کے گروپس میں کسی ایک کو جوائن کرنا تھا۔ امریکا سے مالی امداد اور سوشل میڈیا کو کنٹرول کرنا علیمہ خانم کی ذمہ داری ہے۔

جبکہ مجھے اپنے گروپ میں شامل کرنے کیلئے ہمیشہ سخت رویہ اپنایا، علیمہ خان کی زبان آگ اگلتی تھی، میں نے عمران خان کو شکایت کی۔علی محمد خان، عامر ڈوگر ، بیرسٹر گوہراور 29لوگوں کا ٹرائل تھا جب میں نے عمران خان کو علیمہ خان کی شکایت کی تو بانی عمران خان نے کہا کہ کوئی بھی علیمہ خان کا فون نہیں سنے گا اور اس کو بلاک کردے، اس کا پارٹی معاملات سے کوئی تعلق نہیں ہے۔