وفاقی وزیر اطلاعات و نشریات عطا اللہ تارڑ کی والدہ کی زیر قیادت فلسطینیوں سے اظہارِ یکجہتی کے لیے ریلی

جمعہ 18 اپریل 2025 21:35

لاہور(اُردو پوائنٹ اخبارتازہ ترین - این این آئی۔ 18 اپریل2025ء) وفاقی وزیر اطلاعات و نشریات عطا اللہ تارڑ کے حلقہ این اے 127 گرین ٹائون میں فلسطینی عوام سے اظہارِ یکجہتی کے لیے پرامن ریلی نکالی گئیِریلی کی قیادت وفاقی وزیر عطااللہ تارڑ کی والدہ نے کی ،ریلی میں رکن پنجاب اسمبلی میاں عمران جاوید، شہباز طالب، حمزہ، رابعہ افضل سمیت خواتین، بزرگ، نوجوان اور بچے بڑی تعداد میں شریک ہوئے۔

شرکا ء نے فلسطینی پرچم اور یکجہتی کے بینرز تھام رکھے تھے۔وفاقی وزیر کی والدہ نے اسرائیلی جارحیت کی شدید مذمت کرتے ہوئے کہا کہ پاکستان کا ہر شہری فلسطینی عوام کے شانہ بشانہ کھڑا ہے۔ انہوں نے عالمی برادری سے مطالبہ کیا کہ وہ اسرائیلی مظالم کا فوری نوٹس لے اور فلسطینیوں کو ان کا بنیادی حق دلانے میں کردار ادا کرے۔

(جاری ہے)

انہوں نے کہاآج ہم یہاں صرف ایک قوم یا مذہب کے حق میں آواز بلند کرنے کے لیے جمع نہیں ہوئے بلکہ انسانیت، مظلومیت اور حق کے علمبردار بن کر نکلے ہیں۔

فلسطین کے نہتے عوام پر جس ظلم و ستم کا بازار گرم ہے وہ دنیا کے ضمیر کے لیے ایک سوالیہ نشان ہے۔ عورتوں، بچوں، بزرگوں اور معصوم انسانوں پر گرتے بم، تباہ ہوتے گھر اور روتی بلکتی مائیں دنیا کی بے حسی کو بے نقاب کر رہے ہیں۔انہوں نے مزید کہا کہ پاکستان کا ہر فرد فلسطین کے عوام کے ساتھ کھڑا ہے۔ ہمارا دل فلسطین کے بچوں کے ساتھ دھڑکتا ہے، ہماری ماں کی ممتا وہاں کی شہید ماں کے دکھ میں برابر کی شریک ہے۔ آج کی ریلی اس بات کا اعلان ہے کہ ظلم کے خلاف آواز بلند کرنا صرف فرض نہیں، بلکہ ایمان کا حصہ ہے۔ریلی کا اختتام مولانا انور نوری کی جذباتی دعا کے ساتھ ہوا جس میں مظلوم فلسطینیوں کے لیے فتح، امن اور عالمی ضمیر کی بیداری کی دعائیں مانگی گئیں۔