پرزنرز ویلفیئر سوسائٹی بورسٹل جیل فیصل آباد نے 2 قیدی بچوں کا جرمانہ ادا کرکے رہائی دلوا دی

فیصل آباد (اُردو پوائنٹ اخبارتازہ ترین - اے پی پی۔ 19 اپریل2025ء) پرزنرز ویلفیئر سوسائٹی بورسٹل جیل فیصل آباد نے 2 قیدی بچوں کا جرمانہ ادا کرکے انکو رہائی دلوا دی۔ تفصیلات کی مطابق پرزنرز ویلفیئر سوسائٹی بورسٹل جیل میں قیدی بچوں کی فلاح و بہبود، انکی تربیت، صحت اور تعلیم کے حوالے سے کام کررہی ہے جس میں ایسے بچے جو انتہائی غریب ہیں اور وہ اپنے جرمانے ادا نہ کئے جانے کی وجہ سے قید کاٹ رہے ہیں ان کی رہائی کے لئے اقدامات کرنا ان کو قانونی معاونت فراہم کرنا بھی شامل ہے۔

پرزنرز ویلفیئر سوسائٹی نے اب تک جیل کے تمام بچوں کیلئے سردیوں میں گرم کمبل، گرم کپڑے،رمضان المبارک میں روزانہ افطاری کے انتظامات، عید الفطر پر نئے کپڑے، تحفے تحائف و دیگر کھانے پینے کی چیزیں فراہم کی ہیں۔

(جاری ہے)

بچوں کی بیرکوں تک پینے کا پانی نہیں تھا جو سیلانی ویلفیئر فاؤنڈیشن کے تعاون کیساتھ بھاری رقم خرچ کرکے ایک نئی پائپ لائن بیرکوں تک پہنچائی گئی تاکہ گرمی کے موسم میں بچے پینے کا ٹھنڈا پانی حاصل کرسکیں۔

اسی طرح بچوں کی رہائی کیلئے اب تک پانچ بچوں کے بھاری جرمانے ادا کرکے انکی باقی مانندہ قید سے چھٹکارا بھی دلوا دیا۔ گزشتہ روز بھی دوبچوں کے ایک لاکھ پچیس ہزار روپے جرمانے کی رقم ادا کرکے دو بچوں کی بقیہ چھ ماہ کی قید سے رہائی دلوا دی۔ پرزنرز ویلفئیر سوسائٹی کے صدر و سیلانی ویلفئیر فاؤنڈیشن کے اسلم ڈھیڈی نے ایک لاکھ پچیس ہزار روپے جرمانے کی رقم سپرنٹنڈنٹ جیل ملک آصف کے حوالے کی۔

اس موقع پر اسسٹنٹ ڈائریکٹر سوشل ویلفیئر و سرک پراجیکٹ صوفیہ رضوان، نائب صدر پرزنرز ویلفیئر سوسائٹی میاں ندیم احمد اورمسز محسن ملک بھی موجود تھے۔ اس موقع پراسلم ڈھیڈی نے کہا کہ ایک بار پھر بہت بڑی خوشی ہو رہی ہے کہ پرزنرز ویلفیئر سوسائٹی اسیران کی رہائی کیلئے کامیاب ہوئی ہے اور ہمارے ایک مخیر نے اتنی بڑی رقم ادا کرکے ایک بچے کو جیل سے رہائی دلوائی ہے۔

صوفیہ رضوان اور میاں ندیم احمد نے کہا کہ چند مہینوں میں پرنزرز ویلفئیر سوسائٹی نے درجنوں تقریبات کے ذریعے قیدی بچوں میں جینے کی ایک نئی امید پیدا کر دی ہے۔ جب ہم نے بورسٹل جیل میں پراجیکٹ شروع کیا تو بچوں میں ایک مایوسی تھی اور وہ زندگی سے اکتائے ہوئے نظر آرہے تھے۔ جب ہم نے ان بچوں سے بات کی تو وہ ناامیدی کیساتھ تھے۔ لیکن جیسے ہی ہم نے ان کے ساتھ کونسلنگ کی ہے انکی صحت کے حوالے سے میڈیکل کیمپس لگوائے ہیں، انکو ان کی پسند کے مطابق بہترین ریسٹورنٹس سے کھانے انکو جیل میں مہیا کئے ہیں۔

انکی پسند کے کپڑے، تحائف اور دیگر ضروریات زندگی کا سامان فراہم کررہے ہیں تو اب ان میں امید کی ایک نئی کرن پیدا ہوئی ہے اور اب وہ رہائی کے بعد زندگی کو اچھے طریقے سے گزارنے کے لئے پرامید ہیں۔ صوفیہ رضوان نے بتایا کہ اب انکے لئے موٹیویشنل لیکچرز کا بھی باقاعدہ سلسلہ جاری کرنے جا رہے ہیں جن سے بچے جرم سے نفرت اور اخلاقیات و صبر کو زندگی کا مشن بنائیں گے۔

اس موقع پر سپرنٹنڈنٹ ملک آصف نے کہا کہ وہ ان قیدی بچوں کو اپنے بچوں کی طرح سمجھتے ہیں۔ اور انکے ساتھ کبھی بھی قیدیوں والا سلوک نہ کرتے اور نہ کسی کو کرنے دیتے ہیں۔ انہوں نے کہا کہ آج تک اس طرح کسی بھی تنظیم نے کام نہیں کیا جس طرح پرزنرز ویلفیئر سوسائٹی کررہی ہے۔ انہوں نے صوفیہ رضوان کا شکریہ ادا کرتے ہوئے کہا کہ آپ نے پرزنرز ویلفیئر سوسائٹی میں فیصل آباد کے بہترین سماجی کارکن شامل کرکے ایک نئی روایت قائم کردی ہے۔

ہمارا ہر طرح سے تعاون پرزنرز ویلفیئر سوسائٹی کیساتھ رہے گا۔ انہوں نے رہا ہونے والے قدی بچوں کو بھی نصیحت کرتے ہوئے کہا کہ آپکے یہ دن تعلیم و تربیت کے ہیں نہ کہ مجرموں کی طرح زندگی گزارنے کے ہیں۔ آپ اپنے ماں باپ کا حترام کریں اور معاشرے میں امن و سلامتی کیساتھ رہیں گے تو معاشرہ آپکی قدر کرے گا ورنہ کوئی یہاں ملاقات کیلئے بھی کئی بار نہیں آتا۔