Live Updates

پی ایس ایل 10، پشاور زلمی کا ملتان سلطانز کو 228 رنز کا ہدف

ٹام کوہلر کیڈمور کی نصف سنچری ، عبدالصمد اور مچل اوون کی دھواں دھار باریاں

ذیشان مہتاب ہفتہ 19 اپریل 2025 21:49

پی ایس ایل 10، پشاور زلمی کا ملتان سلطانز کو 228 رنز کا ہدف

راولپنڈی (اردو پوائنٹ تازہ ترین اخبار ۔ 19 اپریل 2025ء ) پاکستان سپر لیگ کے دسویں ایڈیشن کے نویں میچ میں پشاور زلمی نے ملتان سلطانز کو کامیابی کے لیے 228 رنز کا ہدف دیا ہے۔

راولپنڈی کرکٹ سٹیڈیم میں کھیلے جارہے میچ میں پشاور زلمی کے کپتان بابر اعظم نے ملتان سلطانز کے خلاف ٹاس جیت کر پہلے بیٹنگ کرنے کو ترجیح دی۔

زلمی کے بلے بازوں نے جارحانہ کھیل پیش کرتے ہوئے مقررہ 20 اوورز میں 7 وکٹوں کے نقصان پر 227 رنز اسکور کیے۔

ٹام کوہلر-کیڈمورنے 52 اور محمد حارث نے 45 رنز کی شاندار اننگز کھیلی۔ حسین طلعت 37 رنز بنا کر آؤٹ ہوئے۔

عبدالصمد 40 اور مچل اوون 34 رنز کی دھواں دار باری نے زلمی کا مجموعی اسکور 227 رنز تک پہنچانے میں کلیدی کردار ادا کیا۔ الزاری جوزف 5 اور لیوک ووڈ 0کے اسکور پر ناٹ آؤٹ پویلین لوٹے۔

(جاری ہے)

سلطانز کی جانب سے ڈیوڈ ولی، مائیکل بریسویل اور عبید شاہ نے 2، 2 جبکہ افتخار احمد نے 1 کھلاڑی کو آؤٹ کیا۔

پشاور زلمی نے 3 تبدیلیاں کرتے ہوئے عبدالصمد، لک ووڈ اور عارف یعقوب کو اسکواڈ میں شامل کیا جب کہ ملتان سلطانز نے دو تبدیلیاں کی ہیں ،عاکف جاوید اور ایشٹن ٹرنر کو ٹیم میں شامل کیا گیا ہے۔

واضح رہے کہ پی ایس ایل 10 میں پشاور زلمی اور ملتان سلطانز اب تک کوئی بھی میچ نہیں جیت سکی ہیں، دونوں ٹیموں نے 2،2 میچز کھیلے اور دونوں کو شکست کا سامنا کرنا پڑا۔

2017ء کی چیمپئن پشاور زلمی کو پہلے میچ میں کوئٹہ گلیڈی ایٹرز نے 80 رنز سے شکست دی جب کہ دوسرے میچ میں اسلام آباد یونائیٹڈ نے 102 رنز کے بڑے مارجن سے ہرایا۔ اسی طرح سیزن 2021ء کی فاتح ٹیم ملتان سلطانز کو اپنے پہلے میچ میں کراچی کنگز کے ہاتھوں 4 وکٹوں کی شکست کا سامنا کرنا پڑا اور دوسرے میچ میں اسلام آباد یونائیٹڈ نے ملتان سلطانز کو 47 رنز سے شکست دی۔