وفاق پہلے نہروں کا منصوبہ ختم کرنے کا اعلان کرے، پھر مذاکرات کریں گے،میئرکراچی

کراچی(اُردو پوائنٹ اخبارتازہ ترین - این این آئی۔ 20 اپریل2025ء)میئر کراچی اور سندھ حکومت کے ترجمان مرتضی وہاب نے کہاہے کہ وفاق پہلے نہروں کا منصوبہ ختم کرنے کا اعلان کرے، پھر مذاکرات کریں گے، پنجاب کے وزرا کے بیانات کی وجہ سے نہروں کا معاملہ خراب ہوا ، وزیراعظم سے فیصلہ چاہتے ہیں، وفاقی حکومت کو نہروں کے منصوبے سے دستبردار ہونا چاہیے، کسی ایک سے پانی لے کر دوسرے کو دینا آئین میں نہیں۔

متنازع کینالز پر صدرپاکستان اور بلاول بھٹو کا واضح موقف ہے۔صدر ایمپریس مارکیٹ میں پارکنگ ایریا کے افتتاح کے موقع پر گفتگو کرتے ہوئے مرتضی وہاب نے الزام عائد کیا کہ نہروں کے معاملے کو پنجاب کے وزرا نے خراب کیا، سندھ نے اپنے مقدمہ کو مضبوطی سے لڑا، وزیراعظم کو بلاول بھٹو کے مطالبے پر کینالز منصوبے کو ختم کردینا چاہیے ۔

(جاری ہے)

مرتضی وہاب نے کہا کہ ہم نے غیر مشروط طور حکومت کا ساتھ اس لیے دیا تھا کیونکہ ہمیں ملک میں امن اور خوشحالی پیاری ہے پنجاب کے وزرا کے بیانات پر یہ معاملات خراب ہوئے۔

انہوں نے کہا کہ یہ بات بلکل عیاں ہے کہ پانی کم ہوتا جارہا ہے، ایک حصے کا پانی کاٹ کر دوسرے کو نہیں دیا جاتا، صدر زرداری، بلاول بھٹو زرداری اور وزیر اعلی سندھ کہہ چکے ہیں کہ کینالوں پر ہمیں کیا تحفظات ہیں، ہم ترقی کے حق میں ہے لیکن پانی کی کمی پر کوئی سمجھوتہ نہیں کیا جاسکتا۔انہوں نے کہا کہ لاہور ہائیکورٹ خود فرمارہی ہے کہ پانی کے لیے کام کیا جائے، وزیر اعظم شہباز شریف کو فوری طور پر کینالوں کے منصوبے کو روکنا چاہیے۔

قبل ازیں، میئر کراچی نے ایمپریس مارکیٹ میں پارکنگ ایریا کا افتتاح کردیا، انہوں نے بتایا کہ پارکنگ ایریا میں 500سے زائد گاڑیوں کی گنجائش ہے، عوام سے جو وعدہ کیا تھا آج اسے وفا کر رہے ہیں۔انہوں نے کہا کہ ایمپریس مارکیٹ ایک تاریخی جگہ ہونے کے ساتھ مسائل کا گڑھ بھی ہے جہاں سے گزرتے ہوئے لوگوں کومشکلات کاسامنا کرنا پڑتا ہے، کے ایم سی نییہاں کے لوگوں کومشکلات سے نکالنے کا عہد کیا۔

انہوں نے کہا کہ اختیارات کارونا نہیں رورہے، شہرکی ترقی کیلیے کام کرتے رہیں گے، ترقیاتی منصوبوں کی راہ میں آنے والوں کومتبادل جگہ دیں گے،شہری اپنی ذمہ داری کا احساس کریں، انتظامیہ کا ساتھ دیں۔مرتضی وہاب نے کہا کہ ماضی کے حکمرانوں کوبڑی فنڈنگ ملی لیکن کام کچھ نہیں کیا، معاملات خوش اسلوبی سے حل کرنے کی کوشش کررہے ہیں، 30اپریل کو ڈینسوہال عوام کے لیے کھول دیا جائے گا۔