پاکستانی سفیر فیصل نیاز ترمذی کی السیرکل آرٹ ویک میں عمران قریشی کی نمائش ’’وینشنگ پوائنٹس‘‘ کی تحسین

دبئی (اُردو پوائنٹ اخبارتازہ ترین - اے پی پی۔ 20 اپریل2025ء) متحدہ عرب امارات میں پاکستان کے سفیر فیصل نیاز ترمذی نے السیرکل ایونیو میں معروف پاکستانی مصور عمران قریشی کی نمائش ’’وینشنگ پوائنٹس‘‘ کا دورہ کیا۔ السرکل آرٹس فاؤنڈیشن کی ڈائریکٹر ندا رضا کے ذریعہ منعقدہ نمائش 13-20 اپریل 2025 تک جاری رہی اور اس میں عمران قریشی کے اختراعی فن پاروںبشمول فوٹو گرافی، ویڈیو، پینٹنگز وغیرہ کی نمائش کی گئی۔

دبئی سے یہاں موصولہ پریس ریلیز کے مطابق اتوار کو اپنے دورہ کے دوران فیصل نیاز ترمذی نے منتظم ندا رضا سے عمران قریشی کے فن پاروں کی تصوراتی گہرائی اور تکنیکی مہارت کے بارے میں تفصیلی بریفنگ حاصل کی۔ انہوں نے عمران قریشی کی پاکستان کی ثقافتی رونقوں کو اپنی گرفت میں لینے کی صلاحیت کو سراہتے ہوئے کہا کہ عمران قریشی کا فن پاکستان کی روزمرہ کی زندگی کوواضح طور پر دلکش بصری داستانوں میں تبدیل کرتا ہے۔

(جاری ہے)

ان کی نظر سے دیکھیں تو ہلچل سے بھری سڑکیں، صوفی مزارات اور ان کے فن تعمیر کا ایک گہرا تعلق ہے، پس منظر میں قوالی کی گونج کے ساتھ ایک صوفی مقبرہ خاص طور پر سحر انگیز اور جذباتی طور پر پرکشش عکاسی ہے۔سفیر فیصل نیاز ترمذی نے پاکستان کے عالمی تشخص اور بین الثقافتی تفہیم کو فروغ دینے میں سافٹ پاور کے طور پر آرٹ کے کردار پر زور دیا۔

انہوں نے پاکستانی فنکاروں کی غیر معمولی صلاحیتوں کو اجاگر کیا اور عصری فن میں ان کی خدمات کو بین الاقوامی سطح پر تسلیم کرنے پر بھی زور دیا۔پاکستانی ثقافت کو فروغ دینے کے لیے سفارت خانے کے عزم کا اعادہ کرتے ہوئے سفیر فیصل نیاز ترمذی نے متحدہ عرب امارات میں پاکستانی فنکاروں کی نمائش کے لیے السیرکل ایونیو جیسے اداروں کے ساتھ مستقبل میں تعاون کے لیے مکمل تعاون کا یقین دلایا۔

انہوں نے مزید کہا کہ ہم ایسے پلیٹ فارمز پر تعاون کرنے کے لیے بے قرار ہیں جو عالمی سطح پر پاکستان کے بھرپور فنی ورثے کو فروغ دیں۔پاکستان سے ستارہ امتیاز اور فرانس کے شیولیئر ڈی ایل آرڈرے ڈیس آرٹس ایٹ ڈیس لیٹریس کے وصول کنندہ عمران قریشی عصری منی ایچر پینٹنگ میں ایک اہم شخصیت ہیں۔ ان کا کام دی میٹرو پولیٹن میوزیم آف آرٹ، وکٹوریہ اینڈ البرٹ میوزیم اور گوگن ہائیم ابوظہبی کے معزز مجموعوں کا حصہ ہیں۔وینشنگ پوائنٹس جسے السیرکل ایونیو نے نیچر مورٹے کے تعاون سے پیش کیا عمران قریشی کی کثیر الشعبہ تخلیق کے ذریعے شہری زندگی کو تلاش کرتی ہے اور روایتی تکنیکوں کو جدید نقطہ نظر کے ساتھ ہم آہنگ بھی کرتی ہے۔