-جے یو آئی ف اور جماعت اسلامی کے اتحاد سے حکومت کو کوئی خطرہ نہیں،سپیکر پنجاب اسمبلی

پیر 21 اپریل 2025 19:55

ش*لاہور(اُردو پوائنٹ اخبارتازہ ترین - آن لائن۔ 21 اپریل2025ء) سپیکر پنجاب اسمبلی ملک محمد احمد خان نے کہا ہے کہ جے یو آئی ف اور جماعت اسلامی کے اتحاد سے حکومت کو کوئی خطرہ نہیں۔دہشت گردی کے خاتمہ کیلئے سپہ سالار نے وہ بات کی جس کے پیچھے پوری قوم کھڑی ہے، پاکستانی ایک مضبوط قوم ہے اور دہشت گردی کا ڈٹ کر مقابلہ کریں گے۔ صوبائی دارالحکومت سے جاری اپنے ایک بیان میں ملک محمد احمد خان کا کہنا تھا کہ ملکی معیشت ترقی کررہی ہے، صرف ایک جماعت کی جانب سے معمولی نوعیت کے سیاسی بلبلے بنتے ہیں، مولانا فضل الرحمان اور جماعت اسلامی کا اتحاد سیاسی طورپر خوش آئند ہے۔

انہوں نے کہا کہ دونوں جماعتیں ماضی میں بھی متحدہ مجلس عمل کے پلیٹ فارم سے کاوشیں کر چکی ہے، حکومت کا کام کسانوں کو سہولت فراہم کرنا ہے، حکومت جب سپورٹ پرائس کے مسئلے سے باہر نکل رہی ہے تو اسے کسانوں کے دیگر مسائل کو بھی دیکھنا ہوگا۔

(جاری ہے)

سپیکر پنجاب اسمبلی کا کہنا تھا کہ میرا یہ خیال ہے کہ حکومت اگر سپورٹ پرائس دیتی ہے تو اس کا اثر پیداوار پر کتنا پڑتا ہے، کیا ہمارا کسان بھی ایک ایکڑ میں سے سو من گندم کی پیداوار حاصل کررہا ہے، 1994ء میں پہلی مرتبہ زرعی ٹیکس کی بات کی گئی۔

محمد احمد خان نے کہا کہ اس وقت پتہ چلا کہ 94فیصد کاشتکاروں کے پاس ساڑھے بارہ ایکڑ رقبہ موجود ہے، اب یہ رقبہ وراثتوں کی تقسیم کے بعد مزید کم ہوگیا ہوگا، سندھ کے پانی کی تقسیم پر اعتراضات کو بلیک میلنگ نہیں سمجھتا، پانی کی تقسیم کے حوالے سے خدشات پر بات ضرور ہونی چاہیے۔ان کا مزید کہنا تھا کہ دہشت گردی کے خاتمہ کیلئے سپہ سالار نے وہ بات کی جس کے پیچھے پوری قوم کھڑی ہے، کوئی ایک گروہ ہم سے ہمارا ملک اور ہماری طرز معاشرت چھین نہیں سکتا، پاکستانی ایک مضبوط قوم ہے اور دہشت گردی کا ڈٹ کر مقابلہ کریں گے۔