حکومت کو ملنے والی غیرملکی امداد میں کمی آگئی

9ماہ کے دوران سعودی عرب نے 3ارب ڈالر ، یو اے ای نے 2ارب ڈالر قرض دیا، چین نے ایک ارب ڈالر قرض رول اوور کیا

پیر 21 اپریل 2025 21:40

اسلام آباد (اُردو پوائنٹ اخبارتازہ ترین - این این آئی۔ 21 اپریل2025ء) حکومت کو ملنے والی غیرملکی امداد میں کمی آگئی، رواں مالی سال امداد کا ہدف 19ارب ڈالر ہے تاہم 9ماہ گزرنے کے باوجود تاحال 5ارب 50کروڑ 75لاکھ ڈالر ہی مل سکے ہیں جو کہ سالانہ ہدف کا محض 28.40فیصد ہے۔اقتصادی امور ڈویژن حکام کے مطابق حکومت کو رواں مالی سال کے پہلے 9ماہ کے دوران حاصل ہوئی بیرونی فنانسنگ میں سے 5ارب 37کروڑ ڈالر بطور قرض ملا جبکہ 13کروڑ 56 لاکھ ڈالر بطور گرانٹ شامل ہیں تاہم اس میں آئی ایم ایف سے ملنے والی ایک ارب ڈالر کی پہلی قسط شامل نہیں ہے۔

اقتصادی امور ڈویژن کے مطابق اس عرصے میں پاکستان کو پچھلے مالی سال کے مقابلے میں 1.39ارب ڈالر کم فنڈز حاصل ہوئے، گزشتہ سال جولائی سے مارچ کے دوران پاکستان کو 6ارب 89کروڑ ڈالر کی بیرونی مالی معاونت موصول ہوئی تھی۔

(جاری ہے)

حکام کے مطابق پاکستان کو موصول ہوئی فنانسنگ کی تفصیلات کے مطابق اس عرصے کے دوران سعودی عرب نے 3 ارب ڈالر ، متحدہ عرب امارات نے دو ارب ڈالر قرض دیا جبکہ چین نے ایک ارب ڈالر قرض رول اوور کیا۔

اس کے علاوہ دیگر عالمی اداروں نے 2ارب 82کروڑ 76لاکھ ڈالر فراہم کئے جن میں سے ایشیائی ترقیاتی بینک کی جانب سے ایک ارب 18کروڑ ڈالر اور عالمی بینک کی جانب سے 72کروڑ ڈالر شامل ہیں۔مالی معاونت فراہم کرنے والے ممالک میں چین، امریکا، سعودی عرب، فرانس، کویت اور جاپان شامل ہیں جبکہ فرانس نے 10کروڑ 80 لاکھ ڈالر، چین نے 9کروڑ 91لاکھ ڈالر، امریکہ نے 4کروڑ ڈالر، جاپان نے 2کروڑ 88لاکھ ڈالر اور کویت نے دو کروڑ 44لاکھ ڈالر کی مالی امداد فراہم کی ہے۔