حکومت نوجوانوں کو مارکیٹ کی ضروریات کے مطابق ہنر مند بنانے کے لئے ووکیشنل ٹریننگ پر توجہ دے رہی ہے،ایمپلائز اولڈ ایج بینیفٹ اور ور کرز ویلفیئر فنڈ کا دائرہ کار بڑھا یاجارہاہے،وزیراعظم شہبازشریف

اسلام آباد (اُردو پوائنٹ اخبارتازہ ترین - اے پی پی۔ 22 اپریل2025ء) وزیر اعظم محمد شہباز شریف نے کہاہے کہ حکومت نوجوانوں کو مارکیٹ کی ضروریات کے مطابق ہنر مند بنانے کے لئے ووکیشنل ٹریننگ پر توجہ دے رہی ہے،ایمپلائز اولڈ ایج بینیفٹ اور ور کرز ویلفیئر فنڈ کا دائرہ کار بڑھا یاجارہاہے۔وزیراعظم آفس کے میڈیا ونگ سے جاری بیان کے مطابق ان خیالات کا اظہار انہوں نے انٹرنیشنل ٹریڈ یونین کنفیڈریشن کے سیکرٹری جنرل لوک ٹرائینگل سے گفتگوکرتےہوئے کیا جنہوں نے منگل کو یہاں ان سے ملاقات کی۔

ملاقات میں علاقائی سیکرٹری جنرل آئی ٹی یو سی شوئیا یوشیڈا کے علاوہ وفاقی وزرا اعظم نذیر تارڑ، احد خان چیمہ، چوہدری سالک حسین، وزیرِ مملکت عون چوہدری، معاون خصوصی طارق فاطمی اور متعلقہ اعلیٰ حکام موجود تھے۔

(جاری ہے)

وزیرا عظم نے انٹرنیشنل ٹریڈ یونین کنفڈریشن کی عالمی سطح پر افرادی قوت کے حقوق کے لئےکوششوں کو سراہتے ہوئے کہا کہ پاکستان انٹرنیشنل لیبر آرگنائزیشن کے ساتھ مل کر مزدوروں اور کارکنوں کے حقوق کے لئے کام کررہا ہے۔

وزیرِاعظم نے کہاکہ حکومت ایمپلائز اولڈ ایج بینیفٹس اور ور کر ویلفیئر فنڈ کا دائرہ کار بڑھا رہی ہے تاکہ زیادہ سے زیادہ ملازمین، کارکنان اور افرادی قوت مستفید ہوسکیں۔وفاقی سطح پر نیشنل ووکیشنل ٹیکنیکل ٹریننگ کمیشن اور صوبائی سطح پر ووکیشنل ٹریننگ انسٹیٹیوٹ نوجوانوں کو ہنر مند بنانے کے کئی تربیتی پروگرام منعقد کرائے جا رہے ہیں تاکہ مارکیٹ کی ضروریات کے مطابق ہنرمند افرادی قوت دستیاب ہو سکے۔

وزیر اعظم نے کہا کہ پاکستان موسمیاتی تبدیلی سے سب سے زیادہ متاثر ہونے والے ممالک میں شامل ہے۔ 2022 کے سیلاب سے پاکستان کو 30 ارب ڈالر کے نقصانات اٹھانے پڑے۔ان موسمیاتی تبدیلیوں کی وجہ سے پاکستان میں مزدوروں اور کارکنوں کو روزگار کے حوالے سے بہت سے مسائل درپیش ہوئے اور نقصانات اٹھانے پڑے۔ موسمیاتی تبدیلی سے لاحق ہونے والے مسائل کے حل کے لئے پاکستان اور اس جیسے دیگر ممالک کو بین الاقومی مالیاتی اداروں کی خصوصی مالی معاونت درکار ہوگی۔

حکومت اس بات کو یقینی بنا رہی ہے کہ ماحولیاتی تبدیلی کے خطرے سے دوچار کمیونٹیز میں ماحولیاتی تبدیلی سے موافقت اور اس کے مضر اثرات کی تخفیف اور معاشی طور پر کمزور طبقے کے معاش کا تحفظ ہو سکے۔ انٹرنیشنل ٹریڈ یونین کنفیڈریشن کے سیکرٹری جنرل لوک ٹرائینگل نے پاکستان میں جمہوری اقدار کی تعریف کرتے ہوئے ملک میں مزدوروں اور کارکنوں کی بہتری کیلئے کئے جانے اقدامات کو سراہا۔\932