راولپنڈی ویمن یونیورسٹی میں سپورٹس گالا کی رنگارنگ اختتامی تقریب،پارلیمانی سیکرٹری شازیہ رضوان کی شرکت

راولپنڈی (اُردو پوائنٹ اخبارتازہ ترین - اے پی پی۔ 22 اپریل2025ء) راولپنڈی ویمن یونیورسٹی میں دوسرے سالانہ سپورٹس گالا کی رنگارنگ اختتامی تقریب کا انعقاد کیا گیا جس میں رکن صوبائی اسمبلی پارلیمانی سیکرٹری انفارمیشن اینڈ کلچر شازیہ رضوان نے بطور مہمان خصوصی شرکت کی۔منگل کو منعقدہ تقریب میں راولپنڈی ویمن یونیورسٹی کے مختلف شعبہ جات سے تعلق رکھنے والی طالبات نے مارچ پاسٹ، ایروبکس اور مارشل آرٹس کے شاندار مظاہرے پیش کیے۔

سپورٹس سوسائٹی کے زیراہتمام ہونے والے سپورٹس گالا (18 تا 22 اپریل) میں بیڈمنٹن، ٹیبل ٹینس، ٹگ آف وار، لڈو، ریس، لیمن سپون ریس اور شطرنج کے مقابلے منعقد ہوئے جن میں طالبات، فیکلٹی، ایڈمنسٹریشن اور سٹاف نے بڑھ چڑھ کر حصہ لیا۔اس موقع پر مہمان خصوصی شازیہ رضوان نے تقریب سے خطاب کرتے ہوئے کہا کہ وزیر اعلیٰ پنجاب مریم نواز کی قیادت میں حکومت خواتین کو ہر شعبے میں بااختیار بنانے کے لیے موثر اقدامات کر رہی ہے۔

(جاری ہے)

انہوں نے راولپنڈی ویمن یونیورسٹی میں کھیلوں کی سہولیات کی مزید بہتری کے لیے مکمل تعاون کی یقین دہانی کرائی۔وائس چانسلر راولپنڈی ویمن یونیورسٹی پروفیسر ڈاکٹر انیلا کمال نے کہا کہ راولپنڈی ویمن یونیورسٹی وزیراعلیٰ پنجاب مریم نواز کے وژن کی روشنی میں طالبات کو ہر میدان میں بااختیار بنانے کے مشن پر عمل پیرا ہے، کھیلوں کے ذریعے طالبات میں خود اعتمادی پیدا کرنے کے لئے یونیورسٹی کی پالیسیوں، کوچنگ اور سپورٹس میں سرمایہ کاری کا نتیجہ ہے کہ آج ہماری بلائنڈ طالبہ شمائلہ کرن پاکستان-آسٹریلیا بلائنڈ کرکٹ ٹورنامنٹ کے لیے ٹیم میں منتخب ہوئی ہیں جو کہ طالبات کو مساوی مواقع فراہم کئے جانے کا منہ بولتا ثبوت ہے۔

ڈاکٹر انیلا کمال نے مزید بتایا راولپنڈی ویمن یونیورسٹی کی میزبانی میں آل پاکستان ویمن روئنگ انٹر یونیورسٹی چیمپئن شپ میں ملک بھر کی 14 ٹیموں نے شرکت کی۔آل پاکستان چیس انٹریونیورسٹی میں 21 ٹیموں نے یونیورسٹی کی میزبانی میں حصہ لیا۔ پرائم منسٹر ٹیلنٹ ہنٹ جوڈو فیڈرل ویمن ایونٹ میں راولپنڈی ویمن یونیورسٹی نے اسلام آباد، گلگت، سکردو اور میرپور میں کامیاب مقابلے منعقد کرائے جس میں یونیورسٹی کی ایک طالبہ نے قومی سطح پر سلور میڈل جیتا۔

47ویں آل پاکستان بیڈمنٹن انٹر یونیورسٹی چیمپئن شپ میں بھی یونیورسٹی نے بھرپور شرکت کی۔انہوں نے بتایا کہ راولپنڈی ویمن یونیورسٹی کی کھلاڑیوں نے مختلف قومی و بین الجامعاتی مقابلوں میں شاندار کامیابیاں حاصل کیں جن میں3 گولڈ میڈلز، 4 سلور میڈلز اور 8 برونز میڈلز شامل ہیں۔ 36ویں روئنگ چیمپئن شپ میں 2 طالبات نے گولڈ میڈل جیتا، 4 طالبات کو اعلیٰ کارکردگی پر ایچ ای سی نے سکالرشپس دیں۔

اس کے ساتھ ساتھ ڈاکٹر انیلہ نے شازیہ رضوان کا اپنا قیمتی وقت دینے اور طالبات کی حوصلہ افزائی کرنے پر شکریہ ادا کیا۔تقریب کے اختتام پر مقابلوں میں نمایاں کارکردگی دکھانے والی طالبات، فیکلٹی اور انتظامیہ کے افراد میں انعامات تقسیم کیے گئے۔ڈائریکٹر سٹوڈنٹ افیئرز ڈاکٹر ہما فواد نے آخر میں تقریب کے تمام شرکا کا شکریہ ادا کیا۔