Live Updates

امریکی رکن کانگریس جیک برگمین کا عمران خان کی رہائی کا مطالبہ

ریپبلکن کانگریس مین جیک برگمین نے حال ہی میں امریکی وفد کے ہمراہ پاکستان کا دورہ کیا تھا، دورے کے دوران آرمی چیف اور حکومتی رہنماوں سے اہم ملاقاتیں ہوئی تھیں

محمد علی بدھ 23 اپریل 2025 00:24

واشنگٹن (اُردو پوائنٹ اخبارتازہ ترین۔ 22 اپریل2025ء) امریکی رکن کانگریس جیک برگمین کا عمران خان کی رہائی کا مطالبہ ، ریپبلکن کانگریس مین جیک برگمین نے حال ہی میں امریکی وفد کے ہمراہ پاکستان کا دورہ کیا تھا، دورے کے دوران آرمی چیف اور حکومتی رہنماوں سے اہم ملاقاتیں ہوئی تھیں۔ تفصیلات کے مطابق چند روز پاکستان آنے والے اہم امریکی وفد میں شامل سینئر امریکی رکن کانگریس جیک برگمین کا اہم بیان سامنے آیا ہے۔

دورہ پاکستان سے واپس جانے کے بعد امریکی رکن کانگریس جیک برگمین نے بانی تحریک انصاف اور سابق وزیر اعظم عمران خان کی رہائی کا مطالبہ کر دیا۔ اس حوالے سے ان کی جانب سے سماجی رابطوں کی ویب سائٹ ایکس پر بیان جاری کیا گیا۔

اپنے بیان میں جیک برگمین نے کہا کہ میرے پاکستان کے دورے اور وہاں و امریکہ میں رہنماؤں و کمیونٹیز سے ملاقاتوں کے بعد، میں ایک بار پھر عمران خان کی رہائی کے مطالبے کو دہراتا ہوں۔

(جاری ہے)

انہوں نے مزید کہا کہ ایک مضبوط امریکہ پاکستان شراکت داری مشترکہ اقدار، جمہوریت، انسانی حقوق، اور اقتصادی خوشحالی پر قائم ہوتی ہے۔ آئیے آزادی اور استحکام کے لیے مل کر کام کریں۔ جیک برگمین نے اپنے ایکشن پیغام کے آخر میں #FreeImranKhan کا ہیش ٹیگ بھی استعمال کیا۔ واضح رہے کہ اس سے قبل دیگر کئی اہم امریکی رہنما اور اراکین کانگریس بھی بانی تحریک انصاف عمران خان کی رہائی کا مطالبہ کر چکے۔

جبکہ جیک برگمین جس امریکی وفد کے ہمراہ حال ہی میں پاکستان آئے، اس وفد کے حوالے سے حکومتی ذرائع کا دعوٰی تھا کہ انہوں نے اپنے دورے کے دوران عمران خان سے متعلق کوئی گفتگو نہیں کی۔ تاہم اب اس وفد میں شامل جیک برگمین نے عمران خان کی رہائی کا مطالبہ کر دیا ہے۔