صوبائی اسمبلی ،حلقہ پی پی52 میں ضمنی انتخاب کی سرگرمیوں کا آغاز

بدھ 23 اپریل 2025 19:33

لاہور (اُردو پوائنٹ اخبارتازہ ترین - اے پی پی۔ 23 اپریل2025ء) صوبہ پنجاب کے صوبائی اسمبلی حلقہ پی پی 52 سیالکوٹ میں انتخابی سرگرمیوں کا آغاز ہوگیا ہے۔الیکشن کمیشن کی جانب سے صوبائی حلقہ پی پی 52کیلئے ڈسٹر کٹ ریٹرننگ آفیسر اور ریٹرننگ آفیسر کی تعیناتی کا اعلامیہ جاری کیا جا چکا ہے۔صوبائی الیکشن کمشنر پنجاب شریف اللہ نے سیالکوٹ کے حلقہ پی پی52 کے ڈسٹر کٹ ریٹرننگ آفیسر سے حلف لے لیا۔

(جاری ہے)

الیکشن کمیشن کے جاری کردہ شیڈول کے مطابق ریٹرننگ افسر کی جانب سے پبلک نوٹس جار ی کر دیا گیا ہے، امیدواران کے کاغذات نامزدگی 23 تا25 اپریل2025 تک ریٹرننگ آفیسر کے پاس جمع کروانے کا سلسلہ جاری ہے جبکہ کاغذات نامزدگی کی جانچ پڑتال 30 اپریل تک مکمل کی جائے گی۔کاغذات نامزدگی کے منظور یا مسترد ہونے کے خلاف اپیلیں دائر کرنے کی آخری تاریخ 3 مئی ہے جبکہ امیدواران کی انتخابی نشانات کے ساتھ حتمی فہرست 13مئی کو جاری کی جائے گی۔مذکورہ صوبائی اسمبلی حلقے میں یکم جون 2025 بروز اتوار کو پولنگ کا انعقاد کیا جائے گا ۔