پہلگام میں دہشت گردانہ حملے میںمعصوم سیاحوں کی ہلاکت ،بیرسٹر سلطان کا اظہار تشویش

اسلام آباد (اُردو پوائنٹ اخبارتازہ ترین - این این آئی۔ 23 اپریل2025ء)صدر آزاد جموں و کشمیر بیرسٹر سلطان محمود چوہدری نے مقبوضہ کشمیر کے ضلع اننت ناگ کے علاقے پہلگام میں دہشت گردانہ حملے میںمعصوم سیاحوں کی ہلاکت پر تشویش کا اظہار کرتے ہوئے کہا ہے کہ دہشت گردوں کا کوئی مذہب نہیں ہوتا ۔ دنیا کا کوئی بھی مذہب انسانیت کے قتل کی اجازت نہیں دیتا ۔

مقبوضہ کشمیر میں بے گناہ سیاحوں کا قتل عام قابل مذمت ہے۔مودی سرکار پر جنگی جنون کا بھوت سوار ہے اور اس سے قبل بھی بھارت نے 2019میں پلوامہ میں پیش آنے والے واقعہ کی تحقیقات کیے بغیر ہی پاکستان کو مورد الزام ٹھہرایا اور اب بھی بھارت نے پہلگام واقعہ کے وقوع پذیر ہونے کے صرف پانچ منٹ بعد ہی پاکستان کوبغیر کسی ثبوت کے اس حملے کا ذمہ دار قرار دے دیا جو کہ مودی سرکار کی بوکھلاہٹ کا واضح ثبوت ہے بھارت پاکستان پر بے بنیاد الزامات لگا کر اپنے جرائم کو چھپانا چاہتا ہے لیکن بھارت کے اس جھوٹے پروپیگنڈے کو اب دنیا جان چکی ہے بھارت چونکہ اب عالمی دہشت گرد کے طور پر سامنے آیا ہے کیونکہ بھارت نے کینیڈا سمیت دیگر ممالک میں دہشت گردی کی کارروائیاں کی ہیں اور دنیا بھارت کے مکروہ عزائم سے بخوبی آگاہ ہے۔

(جاری ہے)

اب جبکہ امریکہ کے نائب صدر بھارت کے دورے پر ہیں اور اسی دوران بھارت نے پہلگام میں فالس فلیک اپریشن کا ڈرامہ رچا کر دنیا کی آنکھوں دھول جھونکنے کی ناکام کوشش کی ہے لیکن بھارت کے ان مکروہ عزائم کی قلعی جلد دنیا کے سامنے آشکار ہو جائے گی۔ صدر آزاد جموں وکشمیر بیرسٹر سلطان محمود چوہدری نے کہا کہ بھارت ماضی میں بھی مقبوضہ کشمیر میں یا بھارت کے اندر مختلف فالس فلیگ اپریشن کر کے اُس کا الزام پاکستان پر لگاتا رہا ہے ۔

بھارت پہلگام میں ہونے والے اس واقعہ کا الزام پاکستان پر لگانے کے بجائے صاف اور شفاف تحقیقات کروائے اور اس میں ملوث افراد کو انصاف کے کٹہرے میں کھڑا کیا جائے۔ صدر آزاد جموں وکشمیر بیرسٹر سلطان محمود چوہدری نے کہا کہ ہم مقبوضہ کشمیر میں سیاحوں پر فائرنگ کے اس واقعہ کی بھرپور مذمت کرتے ہیں اور فائرنگ سے جان کی بازی ہارنے والوں کے لواحقین سے اظہار تعزیت اور اس واقعہ میں زخمی ہونے والوں کی جلد صحت یابی کی دعا کرتے ہیں۔ صدر آزاد جموں وکشمیر بیرسٹر سلطان محمود چوہدری نے کہا کہ ہم امن پسندقوم ہیں اور اس طرح کے دہشت گردی کے واقعات دنیا میں جہاں کہیں بھی ہوں تو ہم اس کی بھرپورمذمت کرتے ہیں۔