وزیرا علیٰ پنجاب کے اجتماعی شادیوں کے فلاحی اقدام'' دھی رانی'' کے تحت محکمہ میانوالی میں 53 مستحق جوڑوں کی اجتما عی شادیوں کی تقریب کا انعقاد

لاہور (اُردو پوائنٹ اخبارتازہ ترین - اے پی پی۔ 23 اپریل2025ء) وزیرا علیٰ پنجاب مریم نواز شریف کے اجتماعی شادیوں کے فلاحی اقدام'' دھی رانی'' پروگرام کے دوسرے مرحلہ کے تحت محکمہ سوشل ویلفیئر اینڈ بیت المال کے زیر اہتمام میانوالی میں 53 مستحق جوڑوں کی اجتما عی شادیوں کی پروقار تقریب نجی شادی ہال میں منعقدہ ہو ئی۔تقریب کے مہمان خصوصی صوبائی وزیر سما جی بہبود و بیت المال پنجاب سہیل شوکت بٹ تھے۔

صوبائی وزیر سوشل ویلفیئر شادی ہال پہنچے تو ڈپٹی کمشنر میانوالی خالد جاوید گورائیہ اور سابق ایم پی اے ملک فیروز جوئیہ نے ان کا استقبال کیا۔صوبائی وزیر سماجی بہبود و بیت المال سہیل شوکت بٹ، سابق ایم پی ملک فیروز جوئیہ، جنرل سیکرٹری پی ایم ایل این حکیم ایو ب قریشی اور ڈپٹی کمشنر خالد جاوید گورائیہ نے نوبیاہتا جوڑوں کی نشستوں پر جا کر سلامی اور تحائف کی رقوم کے اے ٹی ایم کارڈزتقسیم کئے اور نیک تمنائوں کا اظہار کرتے ہوئے انہیں مبارکباد پیش کی جبکہ وزیر اعلی پنجاب کی جانب سے ہر جوڑے کو 2لاکھ 22ہزار روپے کے تحائف دیئے گئے۔

(جاری ہے)

نوبیاہتا جوڑوں نے سلامی اور تحائف کی فراہمی پر وزیراعلی پنجاب مریم نواز شریف کا شکریہ ادا کیا۔ صوبائی وزیر سما جی بہبود وبیت الما ل پنجاب سہیل شوکت بٹ نے کہا کہ دھی رانی پروگرام وزیر اعلی پنجاب کا تاریخ ساز اقدام ہے جس کی ما ضی میں کہیں مثال نہیں ملتی۔انہوں نے کہا کہ وزیراعلی پنجاب نے دھی رانی پروگرام لانچ کر کے والدین کیلئے ایک شفیق بیٹی اور قوم کی ان بیٹوں کیلئے ایک شفیق ماں کا کردار ادا کیا۔

صوبائی وزیر سماجی بہبو د و بیت الما ل نے کہا کہ دھی رانی پروگرام کے تحت اس سال 3 ہزار سے زائد جوڑوں کی اجتماعی شادیاں کرائی گئیں جو تکمیل کے آ خری مراحل میں ہیں جبکہ اگلے سال انشا اللہ اس پروگرام کے دائرہ کار کو بڑھاتے ہوئے 5ہزار جوڑوں کی اجتماعی شادیاں کرائی جائیں گی اور یہ سلسلہ جاری رہے گا۔ تقریب میں ڈپٹی کمشنر خالد جاوید گورائیہ، نورین، ڈپٹی ڈائر یکٹر سوشل ویلفیئر ڈاکٹر ملک محمد نا صر، ڈائر یکٹر ایڈمن سوشل ویلفیئر پنجاب فیض نعیم وڑائچ، ڈپٹی ڈائریکٹر این جی اوز صفدر عباس کے علاہ شادی شدہ جوڑوں کے والدین اور فیملزنے شرکت کی۔