استحکام پاکستان پارٹی کا جنوبی پنجاب میں ورکرز کنونشن کا فیصلہ

سرحدوں پر دو اطراف سے چیلنجز کا سامنا،سیاست کو ترقی و سلامتی سے مشروط ہونا چاہئے ،عبدالعلیم خان سیاسی استحکام کی جتنی ضرورت آج ہے شاید پہلے کبھی نہ تھی،استحکام پاکستان پارٹی اپنی ذمہ داریوں سے ہر لحاظ سے عہدہ برآ ہوتی رہے گی، وفاقی وزیر

بدھ 23 اپریل 2025 21:50

اسلام آباد (اُردو پوائنٹ اخبارتازہ ترین - این این آئی۔ 23 اپریل2025ء)صدر استحکام پاکستان پارٹی اور وفاقی وزیر عبدالعلیم خان نے کہا ہے کہ پاکستان کو سرحدوں پر دواطراف سے مستقل چیلنجز کا سامنا ہے، وطن عزیز کو سیاسی استحکام کی جتنی ضرورت آج ہے پہلے شاید کبھی نہ تھی،ملکی سیاست کو قومی ترقی و سلامتی سے مشروط ہونا چاہیے ،استحکام پاکستان پارٹی اس ضمن میں اپنی ذمہ داریوں سے ہر لحاظ سے عہدہ برآ ہوتی رہے گی۔

ان خیالات کا اظہار عبدالعلیم خان نے پارٹی کے صوبائی سیکرٹریٹ میں سینئر رہنماں سے ملاقات میں گفتگو کرتے ہوئے کیا۔ عبدالعلیم خان نے کہا کہ استحکام پاکستان پارٹی کو پنجاب بھر میں متحرک کرنے جا رہے ہیں اور پہلے مرحلے میں پارٹی ورکرز کے کنونشن کا آغاز جنوبی پنجاب سے کریں گے۔

(جاری ہے)

انہوں نے کہا کہ4مئی کو لیہ اور 11مئی کو فیصل آباد میں آئی پی پی ورکرز کنونشن منعقد ہوں گے جن میں پارٹی تنظیم کو اپنی کارکردگی کے اظہار کا بھرپور موقع ملے گا۔

صدراستحکام پاکستان پارٹی عبدالعلیم خان سے پنجاب کے صدر رانا نذیر احمد خان،جنرل سیکرٹری و ایم پی اے شعیب صدیقی، جنوبی پنجاب کے صدر رفاقت علی گیلانی، جنرل سیکرٹری تحسین نواز گردیزی، استحکام پاکستان پارٹی لاہور کے صدر ملک زمان نصیب، جنرل سیکرٹری رانا جاوید اقبال اور سینئر رہنما چوہدری نوریز شکور نے ملاقاتیں کیں۔ صدر استحکام پاکستان پارٹی عبدالعلیم خان نے عمر فرید خان کو آئی پی پی جنوبی پنجاب کے یوتھ ونگ کا صدر مقرر ہونے کا نوٹیفکیشن دیا اور ان کو اور ان کے دیگر عہدیداروں کو پارٹی مفلر پہنائے۔

پارٹی رہنماں نے وسطی پنجاب اور جنوبی پنجاب میں پارٹی کی رکنیت سازی مہم اور دیگر سیاسی سرگرمیوں کے بارے میں بریفنگ دیتے ہوئے بتایا کہ ہر ضلع میں تحصیل کی سطح پر استحکام پاکستان پارٹی کو متحرک کیا جا رہا ہے اور انشا اللہ مئی میں ہونے والے ورکرز کنونشن پارٹی کی مقبولیت کا منہ بولتا ثبوت ہوں گے۔