Live Updates

پی ٹی اے کی گلگت شہر میں IMEI کلوننگ اور ٹیمپرنگ کے حوالے سے کارروائی

جمعرات 24 اپریل 2025 17:15

اسلام آباد (اُردو پوائنٹ اخبارتازہ ترین - این این آئی۔ 24 اپریل2025ء)پاکستان ٹیلی کمیونیکیشن اتھارٹی (پی ٹی ای) نے فیڈرل انویسٹی گیشن ایجنسی (ایف آئی ای) اور مقامی پولیس کے اشتراک سے گلگت شہر کے این ایل آئی مارکیٹ میں واقع چار موبائل مرمت کی دکانوں پر چھاپہ مارا، جو مبینہ طور پر موبائل ڈیوائسز کی IMEI کلوننگ اور ٹیمپرنگ میں ملوث تھیں۔

(جاری ہے)

چھاپے کے دوران قانون نافذ کرنے والے اداروں نے دکانوں سے دو لیپ ٹاپس اور دو سی پی یو قبضے میں لے لیے جبکہ ایف آئی اے نے باضابطہ انکوائری کا آغاز کر دیا ہے اور قبضے میں لی گئی ڈیوائس کو فارنزک تجزیے کے لیے بھجوا دیا گیا ہے، جس کی روشنی میں آئندہ قانونی کارروائی کا تعین کیا جائے گا۔

یہ اقدامات پی ٹی اے کے ان مسلسل کاوشوں کا تسلسل ہیں جن کا مقصد موبائل نیٹ ورکس کے نظام کو متاثر کرنے والی غیر قانونی سرگرمیوں کی روک تھام ہے۔ IMEI نمبر کی غیر قانونی تبدیلی کی روک تھام اور صارفین کے مفادات کے تحفظ کے لیے پی ٹی اے اپنی کاوشیں جاری رکھے گا۔