تاریخ کے مضمون کی مغربی ممالک میں بہت اہمیت ہے، ڈاکٹر محمد علی

لاہور (اُردو پوائنٹ اخبارتازہ ترین - اے پی پی۔ 24 اپریل2025ء) وائس چانسلر پنجاب یونیورسٹی پروفیسر ڈاکٹر محمد علی نے کہا ہے کہ تاریخ کے مضمون کی مغربی ممالک میں بہت اہمیت ہے ۔ وہ پنجاب یونیورسٹی شعبہ تاریخ و مطالعہ پاکستان کے زیر اہتمام کام کی جگہ پر صحت اندورنی و بیرونی نقطہ نظر پر انسٹیٹیوٹ آف کیمسٹری کے آڈیٹوریم میں منعقدہ سیمینار سے خطاب کررہے تھے ۔

اس موقع پر سپین میں پاکستان کے سفیر ڈاکٹر ظہور احمد، ڈین فکلٹی آف آرٹس اینڈ ہیومینٹیزپروفیسرڈاکٹر محبوب حسین،فیکلٹی ممبران اور طلبا وطالبات نے بڑی تعداد میں شرکت کی۔ وائس چانسلرپروفیسر ڈاکٹر محمد علی نے کہا کہ امریکہ میں تاریخ کا مضمون خاص طور پر پڑھایاجاتا ہے، تاریخ پڑھنے سے ماضی کو جان کر اور حال کا معائنہ کرکے مستقبل کی منصوبہ بندی میں مدد ملتی ہے۔

(جاری ہے)

انہوں نے کہا کہ قائد اعظم یونیورسٹی کے شعبہ تاریخ سے کئی نامور سول سرونٹ اور بیورکریٹس پیدا ہوئے ہیں،میں چاہتا ہوں کہ پنجاب یونیورسٹی کے طلبہ کامیاب لوگوں سے ملیں اور ان کے تجربات سے استفادہ کریں۔ انہوں نے کہاکہ طلبہ کواپنے اعلی تعلیمی سال میں خوب محنت کرنی چاہیے تاکہ عملی زندگی میں فائدہ ہو۔ اس موقع پرڈاکٹر ظہوراحمد نے شرکا ء کو کام کی جگہ پر صحت کا خیال رکھنے بارے پریزنٹیشن دی۔

انہوں نے کہاکہ ذہنی بیماری کی علامات جسمانی طور پر بھی ظاہر ہوتی ہیں۔انہوں نے کہا کہ ایک طرف جسمانی بیماریوں کے علاج کیلئے ڈاکٹر کو معائنہ کرایا جاتا ہے تو دوسری طرف ذہنی مسائل کے لئے ماہر نفسیات کے بجائے لوگ کسی ہمدردیا دوست کے پاس جاتے ہیں۔ انہوں نے کہا کہ معاشرے میں بہتری اور سکون کے لئے منفی سوچ اور رویوں کوبدلنے کے لئے ضرورت ہے۔

انہوں نے کہا کہ تاریخ کا طالبعلم وسیع ترویژن رکھتا ہے،تعلیم کا مقصد صرف نوکری کا حصول نہیں ہونا چاہیے۔ انہوں نے طلبہ کو نصیحت کرتے ہوئے کہا کہ اگر ترقی کرنی ہے تو سیکھنے کا عمل ہمیشہ جاری رکھنا چاہیے۔پروفیسرڈاکٹر محبوب حسین نے کہا کہ ڈاکٹر ظہور تین دہائیوں سے پاکستان کی طرف سے سے سفارتی فرائض انجام دہی میں مصروف ہیں،ڈاکٹر ظہور ایک کامیاب سفارت کار کے ساتھ انسانی نفسیات کے بہت سے پہلوئوں پر بہترین بات کرتے ہیں۔ انہوں نے کہا کہ سیمینار کے انعقاد کا مقصدطلبہ کو ذہنی صحت کے مسائل اور حل بارے آگاہی فراہم کرنا تھا۔