ٹریفک قوانین کی خلاف ورزیوں پرکریک ڈائون جاری ،23,591موٹر سائیکلیں ضبط

جمعہ 25 اپریل 2025 19:00

کراچی (اُردو پوائنٹ اخبارتازہ ترین - اے پی پی۔ 25 اپریل2025ء) حکومت سندھ کی جانب سے ٹریفک قوانین کی خلاف ورزیوں پر 9اپریل سے شروع ہونے والے کریک ڈائون میں اب تک 23,591موٹر سائیکلیں ضبط کی جاچکی ہیں۔جمعہ کو جاری اعلامیہ کے مطابق سندھ کے سینئر وزیربرائے اطلاعات، ٹرانسپورٹ و ماس ٹرانزٹ شرجیل انعام میمن نے کہا ہے کہ غیر قانونی فینسی نمبر پلیٹس، کالے شیشے اور دیگر ممنوعہ ترامیم پر 1813گاڑیوں کے خلاف کارروائیاں کی گئیں،جن میں ہیوی اور لائٹ ٹرانسپورٹ کی 390گاڑیاں ضبط کی گئیںجبکہ 359گاڑیوں کی رجسٹریشن عارضی طور پر معطل کردی گئی ہے۔

شرجیل انعام میمن نے کہا کہ صوبے بھر میں ٹریفک قوانین کی خلاف ورزیوں کے خلاف شروع کی گئی مہم پوری قوت اور مستقل مزاجی کے ساتھ جاری ہے، سڑکوں پر ٹریفک کی روانی، شہریوں کا تحفظ اور قانون کی بالا دستی حکومت سندھ کی اولین ترجیحات میں شامل ہے ۔

(جاری ہے)

انہوں نے کہا کہ ٹریفک کی بدانتظامی، بغیر ہیلمٹ موٹر سائیکل چلانا، کم عمر ڈرائیورز اور دیگر خطرناک عوامل شہریوں کی زندگی کو خطرے میں ڈالتے ہیں، شہریوں کی جانوں سے کھیلنے والوں کو راہِ راست پر لایا جائے گا۔انہوں نے کہا کہ حکومت سندھ اس مہم کو وقتی نہیں بلکہ ایک مستقل اصلاحی تحریک بنانا چاہتی ہے، عوام مہم کا حصہ بنیں، قانون پر عمل کریں اور دوسروں کو بھی ترغیب دیں کہ وہ ذمہ دار شہری بنیں۔