Live Updates

پولیو کا خاتمہ صرف سرکاری مہم نہیں ، ایک قومی ذمہ داری ہے، عظمٰی کاردار

ہفتہ 26 اپریل 2025 21:40

راولپنڈی (اُردو پوائنٹ اخبارتازہ ترین - اے پی پی۔ 26 اپریل2025ء) ڈپٹی کمشنر آفس راولپنڈی کے کمیٹی روم میں انسداد پولیو مہم کے حوالے سے ایک اہم میڈیا ٹاک کا انعقاد کیا گیا۔ اس موقع پر وزیر اعلی کی معاون خصوصی اور انسداد پولیو کی سرگرم حامی عظمٰی کاردار نے میڈیا سے گفتگو کی۔ تقریب میں ڈپٹی کمشنر راولپنڈی حسن وقار چیمہ،عبداللہ خان اے ڈی سی ہیڈکواٹر، ڈسٹرکٹ ہیلتھ اتھارٹی کے چیف ایگزیکٹو آفیسر (CEO) اور دیگر افسران بھی شریک تھے۔

عظمٰی کاردار نے اپنے خطاب میں کہا کہ پولیو کا خاتمہ صرف ایک سرکاری مہم نہیں بلکہ ایک قومی ذمہ داری ہے، ہر بچہ ہمارا مستقبل ہے اور ہم سب پر لازم ہے کہ اپنے بچوں کو پولیو سے محفوظ رکھنے کے لیے اپنا کردار ادا کریں، والدین کو چاہیے کہ وہ ٹیموں کے ساتھ مکمل تعاون کریں اور اپنے بچوں کو قطرے ضرور پلائیں۔

(جاری ہے)

انہوں نے مزید کہا کہ ہمارے ملک کا مثبت تشخص دنیا میں اسی وقت ابھرے گا جب ہم صحت مند نسل پروان چڑھائیں گے، پولیو جیسی بیماریوں کا خاتمہ پاکستان کی ترقی کے سفر میں ایک سنگ میل ہے، میں میڈیا، مذہبی رہنماؤں، اساتذہ اور معاشرے کے تمام طبقات سے اپیل کرتی ہوں کہ وہ انسداد پولیو مہم کا پیغام گھر گھر تک پہنچائیں۔

انہوں نے کہا کہ یہ ہماری آنے والی نسلوں کا حق ہے کہ ہم انہیں ایک محفوظ، صحت مند اور خوشحال پاکستان دے کر جائیں، ہر ایک بچے تک رسائی ہماری اولین ترجیح ہےتاکہ کوئی بھی بچہ پولیو کے قطرے پینے سے محروم نہ رہ جائے۔ڈپٹی کمشنر حسن وقار چیمہ نے بھی اس موقع پر کہا کہ پولیو کے مکمل خاتمے کے لیے ضلعی انتظامیہ ہر ممکن وسائل بروئے کار لا رہی ہے اور عوامی تعاون اس مہم کی کامیابی میں کلیدی حیثیت رکھتا ہے۔تقریب کے آخر میں تمام شرکاء نے پولیو مہم کو کامیاب بنانے کے عزم کا اعادہ کیا اور عوام سے اپیل کی کہ وہ ٹیموں کے ساتھ مکمل تعاون کریں تاکہ پولیو کا ہمیشہ کے لیے خاتمہ ممکن بنایا جا سکے۔