Live Updates

پاکستان کی جانب سے غزہ متاثرین کیلئے امدادی کھیپ روانہ کردی گئی

کھیپ میں تقریباً 20ٹن ادویات، 5ٹن حفظان صحت کی کٹس اور 15ٹن خیمے شامل

اتوار 27 اپریل 2025 21:05

کراچی(اُردو پوائنٹ اخبارتازہ ترین - این این آئی۔ 27 اپریل2025ء)پاکستان کی نیشنل ڈیزاسٹر مینجمنٹ اتھارٹی نے غزہ کے لوگوں کیلئے قوم کی غیرمتزلزل حمایت کوتقویت دیتے ہوئے فلسطین کیلئے اپنی 15ویں انسانی امدادی کھیپ روانہ کردی ۔یہ کھیپ پاکستان کی جاری انسانی کوششوں کا حصہ ہے اور یہ 26ویں مجموعی امدادی کھیپ ہے جو مشرق وسطی کے جنگ سے متاثرہ لوگوں کیلئے بھیجی گئی ہے۔

(جاری ہے)

الخدمت فاؤنڈیشن کے تعاون سے بھیجی گئی تازہ ترین کھیپ میں تقریباً 20ٹن ادویات، 5ٹن حفظان صحت کی کٹس اور 15ٹن خیمے شامل ہیں،یہ امداد ایک چارٹرڈ پرواز کے ذریعے جناح انٹرنیشنل ایئرپورٹ، کراچی سے عمان (اردن)تک پہنچائی گئی۔رائل میڈیکل سروسز اردن فلسطین کے لوگوں کو آگے کی تقسیم کیلئے وصول کرے گی۔پاکستان نے مجموعی طور پر 1,518ٹن امدادی امداد خصوصی طور پر فلسطین کے لیے روانہ کی ہے جو کہ اس مشکل وقت میں غزہ کے عوام کی حمایت کیلئے ملک کے مسلسل عزم کو ظاہر کرتا ہے۔مجموعی طور پر پاکستان نے 2,045ٹن انسانی امداد روانہ کی ہے جس میں 416ٹن لبنان اور 111ٹن شام کیلئے شامل ہیں۔