سندھ حکومت کی جانب سے ٹریفک قوانین کی خلاف ورزیوں کے خلاف کریک ڈائون جاری،25,625 موٹرسائیکلیں تحویل میں لی گئیں

ْیہ مہم ایک وقتی کارروائی نہیں بلکہ ایک جامع اصلاحاتی عمل ہے جو بغیر کسی تفریق کے جاری رہے گا،عوامی تعاون کے بغیر پائیدار تبدیلی ممکن نہیں، تمام شہری، ڈرائیورز اور ٹرانسپورٹرز قوانین کا احترام یقینی بنائیں،شرجیل میمن

پیر 28 اپریل 2025 15:45

کراچی(اُردو پوائنٹ اخبارتازہ ترین - این این آئی۔ 28 اپریل2025ء)سندھ حکومت کی جانب سے ٹریفک قوانین کی خلاف ورزیوں کے خلاف کریک ڈائون جاری ہے،16اپریل سے 28اپریل کے دوران ٹریفک قوانین کی خلاف ورزیوں پر25,625 موٹرسائیکلیں تحویل میں لی گئیں۔محکمہ ٹرانسپورٹ حکومت سندھ کی رپورٹ کے مطابق غیر قانونی رکشہ نما موٹرسائیکلوں(چنگچیز)کے خلاف کارروائی میں 278 گاڑیاں ضبط کر کے عدالت میں جمع کرائی گئیں اور 278 ڈرائیورز کو گرفتار کر لیا گیا۔

سندھ کے سینئروزیرشرجیل انعام میمن کے مطابق مہم کے دوران 16 سے 28 اپریل کے دوران ماڈل روڈز پر دفعہ 188 کے تحت 99 ایف آئی آرز، تیز رفتاری/لاپرواہی سے ڈرائیونگ پر دفعہ 279 کے تحت 1 مقدمہ اور دفعہ 341 کے تحت 21 مقدمات درج کیے گئے۔انہوں نے بتایاکہ بغیر رجسٹریشن چلنے والی 13 چنگچیز کو بھی تحویل میں لیا گیا، 27 ایل پی جی/سی این جی کٹس ضبط کی گئیں اور 4,119 چالان جاری کیے گئے۔

(جاری ہے)

ہیوی اور لائٹ ٹرانسپورٹ گاڑیوں کے خلاف بھی سخت کارروائی کی گئی، جس میں 416 گاڑیاں ضبط کی گئیں۔اسی دوران ہیوی اور لائٹ ٹرانسپورٹ کی 25 گاڑیوں کی رجسٹریشن منسوخی کے لیے سفارش کی گئی ہے۔ شرجیل انعام میمن نے بتایاکہ380 گاڑیوں کی رجسٹریشن کو مشروط طور پر معطل کر کے تکنیکی بہتری اور فٹنس کی تجدید کے بعد چھوڑ دیا گیا۔انہوں نے کہاکہ حکومت سندھ اپنی سڑکوں کو محفوظ، قانون کے تابع اور شہریوں کے لیے آسان بنانے کے عزم پر پوری شدت سے کاربند ہے۔

یہ مہم ایک وقتی کارروائی نہیں بلکہ ایک جامع اصلاحاتی عمل ہے جو بغیر کسی تفریق کے جاری رہے گا۔شرجیل میمن نے کہاکہ غیر قانونی چنگچی رکشے، بغیر رجسٹریشن گاڑیاں اور غیر معیاری سی این جی/ایل پی جی کٹس کے خلاف بھی موثر مہم جاری ہے۔عوامی تعاون کے بغیر پائیدار تبدیلی ممکن نہیں، تمام شہری، ڈرائیورز اور ٹرانسپورٹرز قوانین کا احترام یقینی بنائیں