Live Updates

اسلام آباد سے قبل ازحج آپریشن کل رات سے شروع ہوگا

پی آئی اے کی پہلی پرواز 300 سے زائد عازمین کو لیکر مدینہ روانہ ہوگی. رپورٹ

میاں محمد ندیم پیر 28 اپریل 2025 16:07

اسلام آباد سے قبل ازحج آپریشن کل رات سے شروع ہوگا

اسلام آباد(اردوپوائنٹ اخبارتازہ ترین-انٹرنیشنل پریس ایجنسی۔28 اپریل ۔2025 )اسلام آباد انٹرنیشنل ایئرپورٹ سے قبل از حج آپریشن منگل سے شروع ہو رہاہے پی آئی اے کی پہلی پرواز پی کے 713 علی الصبح صبح 5 بجے 300 سے زائد عازمین کو لیکر مدینہ روانہ ہوگی. رپورٹ کے مطابق ایئرپورٹ منیجر نے بتایا ہے کہ روڈ ٹو مکہ منصوبے کے تحت 4 گھنٹے قبل عازمین ایئرپورٹ پہنچیں گے، ایئرپورٹ پر روڈ ٹو مکہ منصوبے کے حوالے سے سعودی امیگریشن کے کاﺅنٹر قائم کردیے گئے ہیںاسلام آباد سے 100 سے زائد پروازوں پر 28 ہزار سے زائد عازمین جدہ، مدینہ روانہ ہونگے، ابتدائی پرواز پر وزیر مذہبی امورسردار محمد یوسف، سعودی سفیر و دیگر حکام عازمین کو رخصت کریں گی.

(جاری ہے)

پہلی حج پرواز اتوار 29 اپریل کو اسلام آباد سے سعودی عرب کے لیے روانہ ہوگی 67 ہزار 210 نجی عازمین حج اس سال حج پر نہیں جا سکیں گے نجی اسکیم کوٹے کے تحت رواں سال 90 ہزار 830 عازمین نے حج کرناتھا تاہم ان میں سے صرف 23 ہزار 620 پاکستانی ہی اس سال حج پر جا سکیں گے. وزارت مذہبی امور کا کہنا ہے کہ نجی اسکیم کے تحت صرف 26 فیصد نجی عازمین کو حج کی سعادت نصیب ہوگی اور ہر چار میں سے تین پاکستانی عازمین حج پر نہیں جا سکیں گے ذرائع کا کہنا ہے کہ اس معاملے پر وزیر اعظم کی ہدایت پر بنائی گئی تحقیقاتی کمیٹی کی رپورٹ پر بھی پیش رفت نہ ہو سکی جب کہ وزارت خارجہ بھی اب عازمین حج کے لیے کوئی رعایت حاصل نہیں کرسکتی.

دوسری جانب جو 67210 نجی اسکیم کے عازمین حج سے محروم رہیں گے ان کے ذمہ داروں کا بھی تاحال تعین نہیں ہو سکا ہے وزارت مذہبی امور نے بتایا کہ پاکستان سے مجموعی طور پر 50 ہزار 500 عازمین روڈ ٹو مکہ پراجیکٹ کے تحت سعودی عرب جائیں گے. ان میں سے اسلام آباد سے 28 ہزار جبکہ کراچی سے 22 ہزار 500 عازمین روانہ ہوں گے وزارت کے مطابق روڈ ٹو مکہ پراجیکٹ کے تحت اسلام آباد سے 100 جب کہ کراچی سے 80 پروازیں آپریٹ ہوں گی حج عازمین کیلیے اسلام آباد اور کراچی ایئرپورٹ پر کانٹرز بنائے جائیں گے اور اس پراجیکٹ کے عازمین کی امیگریشن سعودی عرب کے بجائے پاکستان میں ہی مکمل ہوگی.