ٹریفک قوانین کی خلاف ورزی پر25ہزار سے زائدموٹرسائیکلیں تحویل میں لی جاچکی ہیں، شرجیل انعام میمن

پیر 28 اپریل 2025 20:12

کراچی (اُردو پوائنٹ اخبارتازہ ترین - اے پی پی۔ 28 اپریل2025ء) سندھ حکومت کی جانب سے ٹریفک قوانین کی خلاف ورزی کے خلاف کریک ڈائون کے دوران اب تک 25ہزار 625موٹرسائیکلیں تحویل میں لی جاچکی ہیں۔پیر کو جاری اعلامیہ کے مطابق سندھ کے سینئر وزیر برائے اطلاعات، ٹرانسپورٹ و ماس ٹرانزٹ شرجیل انعام میمن نے کہا ہے کہ غیر قانونی رکشہ نما موٹرسائیکلوں (چنگچیز)کے خلاف کارروائی میں 278گاڑیاں ضبط کر کے عدالت میں جمع کرائی گئیں اور 278ڈرائیورز کو گرفتار کر لیا گیاہے۔

انہوں نے کہا کہ حکومت سندھ اپنی سڑکوں کو محفوظ، قانون کے تابع اور شہریوں کیلئے آسان بنانے کے عزم پر پوری شدت سے کاربند ہے۔انہوں نے کہا کہ مہم میں 16سے 28اپریل کے دوران ماڈل روڈز پر دفعہ 188کے تحت 99 ایف آئی آرز، تیز رفتاری اورلاپرواہی سے ڈرائیونگ پر دفعہ 279کے تحت ایک مقدمہ اور دفعہ 341کے تحت 21مقدمات درج کیے گئے۔

(جاری ہے)

انہوں نے کہا کہ بغیر رجسٹریشن چلنے والی 13چنگچیز کو بھی تحویل میں لیا گیاجبکہ 27ایل پی جی/سی این جی کٹس ضبط کی گئیں اور 4ہزار 119چالان جاری کیے گئے۔

شرجیل انعام میمن نے کہا کہ ہیوی اور لائٹ ٹرانسپورٹ گاڑیوں کے خلاف بھی کارروائی کی گئی، جس میں 416 گاڑیاں ضبط کی گئیں اورہیوی اور لائٹ ٹرانسپورٹ کی 25گاڑیوں کی رجسٹریشن منسوخی کیلئے سفارش کی گئی ہے۔انہوں نے کہا کہ 380 گاڑیوں کی رجسٹریشن کو مشروط طور پر معطل کر کے تکنیکی بہتری اور فٹنس کی تجدید کے بعد چھوڑ دیا گیاہے۔انہوں نے مزید کہا کہ مہم ایک وقتی کارروائی نہیں بلکہ ایک جامع اصلاحاتی عمل ہے جو بغیر کسی تفریق کے جاری رہے گا۔

انہوں نے کہا کہ غیر قانونی چنگچی رکشے، بغیر رجسٹریشن گاڑیاں اور غیر معیاری سی این جی/ایل پی جی کٹس کے خلاف بھی موثر مہم جاری ہے۔صوبائی وزیر نے کہا کہ عوامی تعاون کے بغیر پائیدار تبدیلی ممکن نہیں، تمام شہری، ڈرائیورز اور ٹرانسپورٹرز قوانین کا احترام یقینی بنائیں۔